Ndarja emocionuese me pandat në Kanada

Mijëra vizitorë u mblodhën në kopshtin zoologjik të Torontos për t’i parë për herë të fundit pandat gjigante, të cilat do të largohen nga ky qytet. Një numër i madh vizitorësh erdhën në kopshtin zoologjik të Torontos për t’u përshëndetur me pandat gjigante, që do të zhvendosen në Calgary.

Pandat Er Shun dhe Da Mao, si dhe këlyshët e tyre binjakë do ta vazhdojnë jetën në qytetin tjetër kanadez. Er Shun dhe Da Mao u dërguan në Kanada në vitin 2013 si pjesë e një programi dhjetëvjeçar të mbarështimit dhe ishte planifikuar të qëndronin në kopshtin zoologjik të Torontos deri në vitin 2018, përcjell albinfo.ch.

Në vitin 2015 panda Er Shun lindi dy panda binjake, duke u bërë sensacion.  E diela ishte dita e tyre e fundit në kopshtin zoologjik të Torontos, derisa shumë vizitorë i sollën fëmijët e tyre për t’u përshëndetur me kafshët simpatike.  Maria Franke, e cila punon në kopshtin zoologjik, tha se largimi i këtyre pandave e ka mërzitur shumë.