Nata më e ftohtë e nëntorit në 30 vitet e fundit

Në lokalitetin e njohur si më të ftohtin në Zvicër, La Brévine, është shënuar temperatura më e ulët për këtë sezon, - 31.4 gradë celsius

Gjatë natës së mbrëmshme dhe mëngjesit të sotëm në Zvicër, siç bën të ditur SF1, kanë mbretëruar temperatura jashtëzakonisht të ulëta. Kështu, në lokalitetin e njohur si më të ftohtin në gjithë Zvicrën La Brévine është shënuar temperatura më e ulët deri më tash për këtë sezon në Zvicër – 31.4 gradë celsius.

Temperatura të ulëta janë shënuar edhe në ultësira dhe në qytete. Kështu, temperatura deri në minus 18 gradë janë shënuar në Mathod ndërsa – 13.9 gradë ka rënë zhiva në termometër në mëngjesin e hershëm edhe në qytetin e Bernës. Pak më “ngrohtë” ka qenë në Cyrih, ku është shënuar temperatura -10.8 gradë celsius.

Meteorologët thonë se temperatura të tilla të ulëta nuk janë të zakonshme për muajin e nëntorit dhe nuk janë shënuar në 30 vitet e fundit. Temperatura të ulëta po vazhdojnë të mbretërojnë edhe gjatë ditës. Ato, varësisht nga vendi, sillen në mes të -4 dhe +4 gradë celsius.