Murati u jep mbështetje nxënësve shqiptarë të Suedisë

Murati me bashkëpunëtorët e tij priti sot në Prishtinë, rreth 25 nxënës nga Suedia që po qëndrojnë në një vizitë disa ditore në Kosovë dhe Shqipëri

Ministri i Diasporës, Valon Murati me bashkëpunëtorët e tij priti sot në Prishtinë rreth 25 nxënës nga Suedia që po qëndrojnë në një vizitë disa ditore në Kosovë dhe Shqipëri. Murati i njoftoi këta nxënës me zhvillimet aktuale e politike si dhe me mësimin shtesë të shqipes në diasporë.

“Unë dua të falënderoj shtetin suedez për përkushtimin dhe integrimin e mësimit të gjuhës shqipe në sistemin arsimor të vendit, pasi që ruajtja e identitetit kulturor dhe historik fillon me njohjen e gjuhës amtare. Po ashtu shfrytëzoj rastin të falënderoj edhe mësimdhënësit për punën e tyre të palodhshme, si dhe arsimtarët suedez në shkollat përkatëse për mbështetjen që e japin”, tha ministri Murati.

Gjatë kësaj pritje, ministri Murati fillimisht i njoftoi nxënësit me figurat më të ndritura të diasporës shqiptare, që janë vendosur si fotografi në ambientet e MeD, duke filluar nga Elena Gjika, Fan Noli, Jeronim De Rada, Nëna Terezë e deri tek Luan Krasniqi, Rita Ora e Lorik Cana, figura për të cilat edhe nxënësit vizitorë kishin njohuri mjaft të mira.

Ai njoftoi edhe për marrëveshjet e Kosovës dhe Shqipërisë për avancimin e mësimit të gjuhës shqipe në diasporë, si dhe për procesin e regjistrit të diasporës dhe mërgatës, duke kërkuar që këto mesazhe të përcillen edhe tek prindërit, bashkatdhetarët tanë.

Në vizitë, përpos mësimdhënësve të gjuhës shqipe, po qëndrojnë  edhe mësimdhënës suedez, të cilët janë impresionuar me bukuritë natyrore dhe historinë e Kosovës dhe Shqipërisë, duke falënderuar Ministrinë e Diasporës për angazhimin dhe mundësimin e realizimit të këtyre vizitave.

Ndryshe, këta studentë janë në kuadër të projekteve të cilat Ministria e Diasporës tashmë tradicionalisht, për çdo vit, i organizon në Kosovë dhe Shqipëri, me moton “të njohim Atdheun”.