Müller: BE i shtron Zvicrës kërkesa të papranueshme

Müller shprehet i sigurt se "kështu si e ka skicuar BE-ja në mandatin e saj, nuk do të ndodhë kurrë..."

Janë bërë të njohura një pjesë e qëndrimeve të reja të formuluara nga Bashkimi Evropian për negociatat rreth marrëveshjes bazë me Zvicrën. Këto qëndrime, të cilat ministrat e 28 vendeve të BE-së i kishin unifikuar më 6 maj, sipas një publikimi prej 7 faqesh të bërë në gazetën “SonntagsZeitung” janë tepër të rënda për t`u pranuar nga Zvicra.

Lidhur me këtë, në po këtë gazetë ka bërë një reagim të ashpër kryetari i FDP/PLR-së, Philipp Müller. “Me këtë mandat, ne gjendemi para kërkesave maksimaliste të BE-së.Kërkesat tona ndryshojnë nga këto”, ka thënë Müller për “SonntagsZeitung”. Në dokumentin e publikuar të BE-së, veç tjerash zë vend edhe kërkesa që marrëveshja bazë të përfshijë edhe mekanizma vëzhgimi dhe kontrolli për zbatimin e saj.

Por, Müller shprehet i sigurt se “kështu si e ka skicuar BE-ja në mandatin e saj, nuk do të ndodhë kurrë. Nëse do të ndodhte, atëherë Zvicra do të bëhej shteti më pak sovran nga të gjithë shtetet e Evropës. BE-ja, sipas Müllerit, duhet ta dijë se Zvicra nuk do ta pranojë kurrë një kërkesë të tillë maksimaliste.

Lidhur me çështjet institucionale të bashkëpunimit me BE-në, negociues në emër të Zvicrës do të jetë ministri i jashtëm, Didier Burkhalter. Ai i përket partisë FDP/PLR dhe, siç thotë Müller, ka marrë nga kjo parti “vijat e kuqe të qarta” që nuk bën të kalohen.