Motoçiklistët pa asnjë incident kthehen në Serbi

Rreth 1000 motoçiklistë kanë marrë pjesë në një rok koncert në Mitrovicën e veriut, ndërsa të dielën  kanë ikur për Serbi

Rreth 1000 motoçiklistë serbë të ardhur nga të gjitha viset e Serbisë kanë qëndruar të shtunën mbrëma në pjesën veriore të Mitrovicës me idenë që ta shënojnë “Vidovdanin”, edhe në Kosovë.

Këta motoçiklistë, siç kanë raportuar pjesëtarë të policisë së Kosovës, janë larguar të dielën paradite për në Serbi, nëpërmjet kufirit në Jarinje.

Këta motoçiklistë kanë marrë pjesë në një rok koncert në Mitrovicën e veriut e banuar me shumicë serbe, ndërsa përkundër gatishmërisë së policisë së Kosovës, nuk është shënuara asnjë incident i theksuar.

“Koncerti ka përfunduar pas orës 12 të natës, dhe në të kanë marrë pjesë 2000 – 2200 vetë. Grupet e motoristëve, që kanë hyrë mbrëmë në Kosovë, deri në mëngjes, e kanë lëshuar territorin e Kosovës në grupe më të vogla. Nuk ka pasur incidente, përveç një aksidenti në fshatin Rudare, kur një prej motoristëve ka dalë nga rruga dhe ka pësuar lëndime të rënda trupore”, ka thënë tha për REL, zëdhënësi i policisë në Mitrovicë, Sami Mehmeti.

Ndryshe, dy vjet më parë në të njëjtën kohë disa qindra pjesëtarë me motoçikleta kishin ardhur nga Serbia në Gazimestan për të shënuar Vidovdanin. Ata kishin sjellë me vete edhe ndihma për serbët e veriut, si dhje në spitalin rajonal kanë dhuruar gjak për nevojtarët serbe të tri komunave veriore.

Këtë vit motoristët kanë arritur dy ditë më vonë, ndërsa kalimin në pjesën e shqiptarëve duket se kishte qenë i pamundur për ta, pasi që Policia e Kosovës duket se nuk ka pranuar t’i shoqërojë. Kjo për faktin se që një grup serbësh të cilët u shoqëruan të enjten nga policia, e keqpërdorën këtë duke sulmuan policinë  me ç’rast u lënduar 32 prej tyre.

Bëhet e ditur se gjatë gjithë natës së mbrëmjes Policia e Kosovës, përfshirë edhe njësitë speciale kanë qenë gati për intervenim, në rast të ndonjë provokimi apo incidenti.