Mosmarrëveshjet politike: Shumica e përfaqësive, pa ambasadorë

Për disa vjet me radhë një numër i madh i përfaqësive diplomatike të Maqedonisë në botë vazhdojnë të jenë pa ambasadorë, përfshirë edhe Zvicrën.

Bëhet fjalë për vendet e Evropës, si Norvegjia, Polonia, Franca, Mali i Zi, Bosnjë e Hercegovina, Zvicra, Spanja, Katari dhe Republika Popullore e Kinës.

Pa konsull është edhe konsullata në Gjermani. Këto përfaqësi diplomatike që aktualisht janë në duart e ushtruesve të detyrës, nga ndarja jozyrtare e kulaqit mes partive të pushtetit, u takojnë diplomatëve shqiptarë. Mospërzgjedhja e tyre është shkak i mosnjohjes së presidentit Ivanov nga ana e BDI-së.
Ish-ambasadori Nano Ruzhin thotë se kjo gjendje e diplomacisë krijon imazh të keq për vendin në misionet diplomatike në botë, transmeton Alsat M, përcjell albinfo.ch.

Nga Ministria e Punëve të Jashtme e Maqedonisë nuk iu përgjigjën pyetjeve të Televizionit Alsat në Shkup, nëse së fundi ka shqyrtuar emërimin e diplomatëve të rinj në krye të përfaqësive diplomatike në botë dhe pse çështja mbahet peng për disa vjet. Thuajse një vit më parë vetë ministri Popovski premtoi zgjidhje të shpejtë të problemit.

I vetmi ambasador shqiptar i Maqedonisë edhe më tej është Naim Memeti në Danimarkë, kurse asnjëherë nuk jemi përfaqësuar me një diplomat shqiptar në Shqipëri dhe Kosovë.