Mjetet piroteknike sërish në modë për festat e fundvitit

Vitin e kaluar, por edhe vitet me parë, nga pakujdesia dhe mungesa e informacioneve për përdorimin e fishekzjarrëve, dhjetëra qytetarë janë lënduar, dhe nga plagët e marra kanë kërkuar ndihmën e mjekut

Sa herë që vijnë festat e fundvitit, fishekzjarret rikthehen sërish në Kosovë, por këtë vit në numër më të vogël, bën të ditur “Evropa e Lirë”.

Në Kosovë kanë hyrë mbi 65 mijë kilogramë fishekzjarre, thonë autoritetet doganore. Ato thonë se krahasuar me vitet e kaluara është shënuar një rënie e importit të këtyre produkteve, përcjell albinfo.ch.

Qytetarët ankohen nga hedhja e pakontrolluar e fishekzjarrëve në qytete, dhe druajnë për pasojat e përdorimit të tyre.

Qytetarët kërkojnë nga autoritetet kompetente që të marrin masa që edhe Kosova, si edhe vendet e tjera evropiane, të festojë festat e fundvitit pa pasur incidente nga përdorimi i mjeteve piroteknike.

Autoritetet në Kosovë thonë se ndër vite kanë arritur të ulin sasinë e mjeteve piroteknike në vend. Me një vendim për ndryshimin e normave të akcizës të Qeverisë së Kosovës, që ka hyrë në fuqi dy vite më parë, është ngritur akciza prej 2 euro për kilogram në fishekzjarrë.

Vitin e kaluar, por edhe vitet me parë, nga pakujdesia dhe mungesa e informacioneve për përdorimin e fishekzjarrëve, dhjetëra qytetarë janë lënduar, dhe nga plagët e marra kanë kërkuar ndihmën e mjekut.