Me minus 36 gradë, sot ka qenë mëngjesi më i ftohtë i këtij dimri në Zvicër

Më së ftohti ka qenë në Glattalp, Kantoni Schwyz, në stacionin meteorologjik të të cilit është regjistruar temperatura minus 36 gradë celsius

Keystone

Në orët e hershme të ditës së sotme janë matur në disa vende temperatura që shkojnë poshtë minus 30 gradëve celsius. Me temperatura të tilla mëngjesi i të mërkurës është më i ftohti për këtë dimër. Temperatura minus 30 gradë është regjistruar në Buffalora të Kantonit Graubünden, njofton SRF Meteo.

Por edhe më ftohtë ka qenë në Glattalp, Kantoni Schwyz, në stacionin meteorologjik të të cilit është regjistruar temperatura minus 36 gradë celsius.

Edhe pse acar i madh ka mbretëruar në gjithë Zvicrën, në rrafshira dhe në qytete, moti kanë qenë sigurisht paksa më i butë në krahasim me pikat e përmendura. Kështu në Cyrih, rreth orës 6 të mëngjesit termometri ka treguar minus 13 gradë celsius. Megjithatë edhe në ultësira janë regjistruar temperatura që kanë arritur deri në minus 20 gradë.

Me gjithë temperaturat e përmendura ekstreme, dimri 2017/2018 është pak më i butë në krahasim me mesataren e viteve të fundit, thonë në SRF Meteo. Këtë e kanë bërë të mundur temperaturat që në janar herë pas here kanë treguar vlera pranverore. Më 9 jnar në Altdorf, Kantoni Uri, ishte regjistruar temperatura prej 18 gradëve.

Pranvera meteorologjike fillon të enjten, më 1 mars.