Ministria e Diasporës me 5 zv.ministra

Për njohësit e zhvillimeve politike, numri kaq i madh i zëvendësministrave po bëhet vetëm për të akomoduar militantët partiak

Qeveria e udhëhequr nga Ramush Haradinaj nuk ka thuajse asnjë ditë që nuk emëron nga një zëvendësministër nëpër ministri të caktuara. Deri tani, në disa dikastere qeveritare janë emëruar edhe nga 4 zëvendësministra.

Zyra e kryeministrit Ramush Haradinaj, përmes një përgjigjeje me shkrim, nuk ka treguar se sa është numri i zevendësministrave, por ka lënë të kuptohet se emërime do të ketë edhe në ditët në vijim. Për njohësit e zhvillimeve politike, numri kaq i madh i zëvendësministrave po bëhet vetëm për të akomoduar militantët partiak, raporton Kohavisioni.

Xhavit Zariqi i AAK-së, pasi nuk arriti të bëhet kryetar i Ferizajt, u emërua zëvendësministër i Diasporës. Por në këtë ministri janë edhe 3 zëvendësministra të tjerë. Faruk Nura, i cili nuk arriti të zgjidhej kryetar i Vitisë, Arian Daci, i biri i Nexhat Dacit, dhe përfaqësuesi i komunitetit boshnjak, Qerim Bajrami. Në ministrin e Diasporës në ditët në vijim pritet të emërohet edhe një zv/ministër nga diaspora.