Kosova

​Ministri i Mbrojtjes në Kosovë, letër të hapur stafit civil dhe ushtarakëve të FSK-së

Ministri i ri Mbrojtjes në Kosovë, Ejup Maqedonci, u është drejtuar përmes një letre të hapur zyrtarëve në këtë ministri dhe të gjithë ushtarakëve të Forcës së Sigurisë së Kosovës, shkruan albinfo.ch.

Ai ka thënë se do të vazhdojnë të zhvillojnë kapacitetet e ministrisë për të siguruar udhëzime strategjike efektive dhe mbikëqyrje demokratike të FSK-së, teksa shtoi se do të vazhdojnë transformimin e FSK-së në forcë me kapacitete të plota ushtarake dhe të gatshme për të përmbushur misionin e saj, siç ka shkruar ai “mbrojtjen territoriale, pjesëmarrjen në misione ndërkombëtare dhe sigurimin e mbështetjes për agjencitë dhe autoritetet civile”.

Maqedonci ka shkruar se gjatë gjithë kohës ka qenë dëshmitar i transformimit të FSK-së në një ushtri profesionale siç është sot.

“Jam i ngazëllyer dhe i entuziazmuar të filloj udhëheqjen e këtij institucioni profesional të civilëve, ushtarëve dhe oficerëve, për të punuar së bashku në zgjidhjen e problemeve dhe përmbushjen e objektivave. Së bashku do të kontribuojmë në zhvillimin e Ministrisë së Mbrojtjes dhe FSK-së, duke siguruar kështu sovranitetin dhe mbrojtjen e integritetit territorial të Republikës së Kosovës”, ka shkruar ai.