Mijëra protestues mbështetën Luginën e Preshevës

Nën organizimin e Lëvizjes Vetëvendosje, mijëra kosovarë protestuan në mbështetje të shqiptarëve të Luginës së Preshevës. Ata kërkuan edhe ndërprerjen e bisedimeve Thaçi-Daçiq

Mijëra qytetarë të Kosovës, kanë protestuar të shtunën në Prishtinë, në mbështetje popullit të Luginës së Preshevës. Nën organizimin e Lëvizjes Vetëvendosje, protestuesit kanë kërkuar më shumë të drejta për shqiptarët e Luginës së Preshevës, ndërkaq kanë kërkuar ndaljen e dhunës nga regjimi i Beogradit.

Protestuesit janë nisur nga Qendra e Studentëve duk marshuar drejt Teatrit Kombëtar, me pankarta në duar dhe duke brohoritur: “Lugina do drejtësi jo hipokrizi”. “Lugina është e jona”, “Duam Bashkim” “Thaçin e japim, Luginën s`e japim” “Qeveri shko në veri, mati forcat me Serbi”, “Stop dhunës në Luginë…”etj.

Lideri i Vetëvendosjes, Albin Kurti kërkoi respektimin e të drejtave civile dhe kthimin e lapidarit të dëshmorëve të UÇPMB-së në oborrin e Kuvendit të Komunës, aty ku ishte më parë. Ai po ashtu kërkoi ndërprerja e menjëhershme e procesit negociator të Kosovës me Serbinë.

“Kërkojmë po ashtu që të kthehet rezoluta e Kuvendit për reciprocitet të plotë politik, ekonomik e tregtar me Serbinë që menjëherë do të sillte tek ndalimi i mallrave serbe në Kosovë dhe ndërmarrja e veprimeve konkrete për shtrirjen e sovranitetit të plotë të Republikës së Kosovës në gjithë territorin e Kosovës”, kërkoi Kurti.

Sipas tij, institucionet e Kosovës deri tani e kanë injoruar problemin ne Preshevë, Medvegjë e Bujanoc.  Qeveritarët, sipas Kurtit, kanë hyrë me pazare politike me Serbinë, “ndërsa nuk mund ta mbrojnë as veriun e Kosovës e as te drejtat e shqiptarëve të Luginës”.

“Thaçi pandershëm i qortoi shqiptarët se nuk e mbrojtën Lapidarin e UÇPMB-së, edhe pse çështjen e Preshevës nuk e bëri kusht për Serbinë. Jemi kundër ‘koalicionit Thaçi e Dacic’ edhe kundër Qeverisë PDK-SPS”, ka thënë Kurti.

Me këtë protestë, ai tha se do t’i dërgohet mesazh qytetarëve atje,  se populli në Kosovës nuk është i të njëjtit mendim sikurse Qeveria e Kosovës.

Protestës, sipas Kurtit, i janë bashkuar edhe një varg organizatash: Sindikata e Pavarur e Bujqve, Sindikata e Pavarur e Pensionisteve, Shoqata e Muhaxherëve të Preshevës, Këshilli për Mbrojtjen e të Drejtave dhe Lirive të Njeriut – Preshevë, Shoqata “Vatra”, Lëvizja Demokratike për Integrim, Shoqata “26 Marsi 1999”, Organizata e Veteranëve të Luftës së UÇPMB – së, etj…

Protesta ka përfunduar e qetë, edhe pse sipas një kumtese që ka lëshuar vetëvendosje, njësia Speciale e Policisë së Kosovës, ka ndaluar autobusin me protestues që po vinte nga Prizreni dhe ka arrestuar dy aktivistë, Karanfil Haxhillarin dhe Agron Limanin.

Protesta e Vetëvendosjes ka përkuar me 13 vjetorin e daljes publike të UÇPMB-së. Sikur sot 13 vjet më parë në fshatin Dobrosin të Bujanocit, në një ceremoni mortore, dolën në skenë ish guerilët e UÇPMB-së. Ata u zotuan se do të luftojnë për më shumë të drejta të shqiptarëve në këtë rajon.

Lufta përfundoi me një marrëveshje të ndërmjetësuar nga ndërkombëtarët, por pikat e saj kurrë nuk u zbatuan nga Beogradit.