Migros-i ua ul përgjysmë qiranë bizneseve të dëmtuara nga korona

Me uljen 50 për qind të qirasë për periudhën nga 18 janari deri më 28 shkurt, do të lehtësohen shumë dyqane që merren me qira në pronat e Migrosit

Qiramarrësit e Migrosit, ndërmarrjes më të madhe të shitjes me pakicë në Zvicër, të prekur nga mbyllja e plotë do të paguajnë vetëm gjysmën e qirasë së tyre për periudhën e valës së dytë të pandemisë, raporton srf.ch.

Për Migrosin, fokusi në këtë rast është në sigurimin e marrëdhënieve afatgjata të biznesit. Ashtu si në vitin e kaluar, ata po punojnë për të gjetur një zgjidhje që do të lehtësonte qiramarrësit, është konfirmuar nga shitësi me pakicë një raport në “Neue Zürcher Zeitung”.

Me uljen 50 për qind të qirasë për periudhën nga 18 janari deri më 28 shkurt, do të lehtësohen shumë dyqane që merren me qira në pronat e Migrosit, siç janë qendrat tregtare, thonë në Migros.

Në sesionin e tij dimëror, parlamenti kishte hedhur poshtë ligjin e qirasë tregtare që kërkonte një heqje të pjesshme të çmimit nga qiraja gjatë valës së parë të koronës, në pranverë, përcjell albinfo.ch. Këshilli Federal dhe shumica e djathtë patën argumentuar se ligji i tillë do të ndërhynte retrospektivisht në marrëdhëniet private kontraktuale.

---