Meta takon bashkatdhetarët në New York

Presidenti i Shqipërisë, Ilir Meta, ka marrë pjesë në meshën e mbajtur në kishën katolike shqiptare “Zoja e Shkodrës” në New York.

Meta përshëndeti bashkatdhetarët e shumtë, duke u shprehur mirënjohje për gjithçka që shqiptarët në Amerikë kanë bërë në ruajtjen e identitetit tonë kombëtar, përcjell albinfo.ch.

“Ju falënderoj për punën e jashtëzakonshme që ju bëni duke i bashkuar të gjithë shqiptarët në SHBA. Të forcojmë identitetin kombëtar, bashkëpunimin e tolerancën ndaj njëri-tjetrit. Bashkëpunim për qëllimet më të larta që i shërbejnë vendit tonë dhe kombit tonë. Nder dhe privilegj të takoja në Vatikan Atin e Shenjtë Papa Françesku. Kënaqësi e jashtëzakonshme, për të dëgjuar lutjet e bekimet e tij për kombin tonë. Porosia e Atit të Shenjtë për të forcuar harmoninë tonë ndërfetare. Porosia e Papës ishte që të bëjmë çdo gjë që Shqipëria të mos pësojë “dimrin demografik” të Evropës. Bekimet e lutjet e tij për kombin tonë të na japin sa më shumë forcë, dashuri e bashkëpunim me njëri-tjetrin”.

Duke folur për vitin e Gjergj Kastriot Skënderbeut, Meta tha se falë kësaj figure ne ekzistojmë si komb.