Mërgimtarët ndërtojnë një shtëpi për të dëmtuarit nga tërmeti në Shqipëri

Nga goditja e tërmetit në vitin 2019 në Shqipëri më së rëndi e kishte pësuar qyteti i Durrësit, përcjell albinfo.ch.

Mërgimtarët kudo në Gjermani, në formë vullnetare, individuale dhe përmes shoqatave, u mobilizuan në organizimin e aksioneve për të ndihmuar familjet e dëmtuara në Shqipëri. Shumë mërgimtarë pa hezitim në kuadër të shoqatave në Gjermani, grumbulluan mjete financiare, ushqime, veshmbathje etj.

Këtij aksioni iu bashkangjitën me kontributin e tyre edhe mërgimtarët e Fuldës me rrethinë, iniciativës së Shoqatës Kulturore Shqiptare “KOSOVA” për grumbullimin e mjeteve për të ndihmuar familjet e dëmtuar nga tërmeti në Shqipëri.

Me mjetet e grumbulluara, nga manifestimi humanitar, kjo shoqatë ndihmoi në ndërtimin e shtëpisë së re të familjes të Shpëtim Xhixhës nga fshati Gjormë i Bashkisë së Kurbinit, pasi që tërmeti atyre iu kishte shkatërruar shtëpinë.

Shtëpia e re e ndërtuar u përurua me dorëzimin e çelësave të shtëpisë familjes Xhixha, nga veprimtari i shquar z.Ukë Blakaj, kryetar i Shoqatës Kulturore Shqiptare “KOSOVA” në Fulda. /Albinfo.ch