Mediat e huaja: Kosova, ‘Brazili i Ballkanit’

Mediat ndërkombëtare vazhdojnë të shkruajnë për suksesin e Kosovës në futboll

Mediat e huaja vazhdojnë të shkruajnë për suksesin që po përjeton Kosova në futboll. Dardanët së fundi mposhtën Çekinë, 2:1, duke i befasuar të gjithë për të mirë, derisa të martën do të ballafaqohen me Anglinë, shkruan albinfo.ch.

Gazetari i “The Guardian”, Bryan Armen Graham, e ka cilësuar Kosovën si ‘Brazili i Ballkanit’.

“Kosova është e 120-ta në botë, e pamposhtur në 15 ndeshje, gjatë një periudhe pothuajse dyvjeçare dhe tani e kryesojnë grupin e tyre në kualifikimet për EURO 2020 për të paktën disa orë. Brazili i Ballkanit”, shkruan Bryan Graham.

Edhe “BBC” shkruan për Kosovën, duke treguar historinë e saj se si për tre vjet pas pranimit, kërkojnë kualifikimin në Evropian.

Gjithashtu edhe mediat e tjera angleze i kushtuan shumë shkrime Kosovës, që po jeton ëndrrën e saj në futboll.

Gjithashtu edhe UEFA nuk e harroi fitoren e Kosovës, duke e cekur se ka 15 ndeshje pa humbje, si asnjë kombëtare tjetër.

Një artikull të gjatë dhe shumë të veçantë ia ka kushtuar edhe specialisti i afatit kalimtar në Itali dhe në Evropë, Gianluca Di Marzio.

“Kontestuar, kohët e fundit, ende pa u njohur nga të gjithë. Por tani djemtë e Challandes kanë qenë të pamposhtur për gati dy vjet dhe ëndërrojnë Evropianin: kështu që futbolli i jep zë një pavarësie së mohuar.

Humbja e fundit në garat zyrtare. Portugali? Qershor 2018. Franca? Qershor 2019. Gjermani? Një ditë më parë. Kosova? 9 tetor 2017. Pastaj gjashtë fitore dhe katër barazime, plus katër rezultate të tjera pozitive në ndeshjet miqësore. Për vite të tëra duke ndjekur realitetin, pastaj duke e kapërcyer atë. Skuadra e Bernard Challandes, e cila mposhti Schick dhe Jankto 2-1 kundër Republikës Czecheke dje, janë duke ”fluturuar” për në vendin e dytë të Grupit A, duke vazhduar rekordin e tyre. Kombëtarja është njohur nga UEFA dhe FIFA vetëm në vitin 2016, pas vjetëve të betejave. Pothuajse gjysma e ekzistencës së saj zyrtare ka kaluar që nga pamposhtja”, shkruan ndër të tjera gazetari i njohur italian.

Edhe mediat zvicerane kanë shkruar shumë, duke lavdëruar edhe punën e trajnerit zviceran, Bernard Challandes.

 

 

---