MeD dhe Oda e Avokatëve, Marrëveshje bashkëpunimi

Qëllimi i kësaj marrëveshjeje është bashkëpunimi në të gjitha çështjet me interes të përbashkët, përfshirë mbrojtjen e interesave të kosovarëve që jetojnë jashtë vendit

Ministri i Diasporës, Valon Murati dhe kryetari i Odës së Avokatëve të Kosovës, Ibrahim Dobruna, nënshkruan të martën një marrëveshje bashkëpunimi mes MeD-së dhe Odës së Avokatëve të Kosovës. Kjo marrëveshje, siç u tha, është e rëndësishme për mbrojtjen e interesave të mërgimtarëve.

“Qëllimi i kësaj marrëveshjeje është bashkëpunimi në të gjitha çështjet me interes të përbashkët, si mbrojtja e interesave të qytetarëve tanë që jetojnë jashtë vendit, koordinimi i aktiviteteve juridike, njohja me të drejtat që u takojnë në vendet ku jetojnë, krijimi i kontakteve nëpërmjet rrjetëzimit të juristëve me diasporën dhe mërgatën, si dhe çështje të tjera të natyrës juridike”, thuhet në njoftimin e MeD-së.

Në kuadër të kësaj marrëveshjeje, MeD-ja do të ndihmohet për projektimin dhe implementimin e projekteve konkrete, siç është rrjetëzimi i juristëve shqiptarë të diasporës dhe mërgatës.

Ministri Murati dhe kryetari i OAK-së, Ibrahim Dobruna, u pajtuan që të krijohen edhe grupe të punës për funksionalizimin e kësaj marrëveshjeje bashkëpunimi.