Me këtë politikë, s’ka liberalizim të vizave as në vitin 2017

Sipas njohësve të integrimeve evropiane, koalicioni qeveritar në Prishtinë po e rrezikon procesin e liberalizimit të vizave për Kosovën edhe për vitin 2017

Koalicioni qeveritar në Kosovë i njohur si “koalicioni i elefantëve” që përbëhet nga tri partitë më të mëdha politike, PDK-LDK dhe Lista Serbe, po dështojnë t’i përmbushin dy kushtet e fundit të BE-së për liberalizimin e vizave. Edhe pse këto parti i kanë 89 deputetë nga 120 sa ka Kuvendi i Kosovës, nuk po arrin ta ratifikojnë marrëveshjen me Malin e Zi për shenjimin e kufirit.

Prandaj, sipas njohësve të integrimeve evropiane, Institucionet qendrore po e rrezikojnë procesin e liberalizimit të vizave për Kosovën edhe për vitin 2017.

Profesor i së Drejtës Evropiane, Avni Mazreku, tha për REL se autoritetet nuk kanë treguar vullnet politik në përmbushjen e kritereve reale për liberalizim të vizave. Sipas tij, përderisa qasja e Qeverisë së Kosovës dhe qasja e vendimmarrësve në Kosovë është krejt deklarative, askush nuk mund të ndihet komod se në vitin 2017, do të ketë liberalizim.

“Kosova duke mos pasur qasje konstruktive e profesionale, por edhe qasje që vjen si rezultat i një konstruktiviteti politik në procesin e qasjes, e ka humbur atë momentin kyç të përmbushjes së kritereve e që përmbushja e kritereve nënkupton edhe stabilizimin politik, ekonomik dhe juridik të vendit. Kosova ka mungesë të stabilitetit politike si pasoj e zhvillimeve politike”, tha Mazrekaj.

Kosova, sipas tij, nuk ka as stabilitet makro-ekonomik dhe është larg rajonit dhe vendeve anëtare të BE-së.

Mazrekaj tha po ashtu se Kosova duhet të punoj shumë edhe në fushën e sundimit të rendit dhe ligjit, si kriter shumë me rëndësi jo vetëm për fushën e sundimit të ligjit në vend, por edhe për procesin e liberalizimit të vizave.

“Kosova është okupuar më shumë me zhvillimet e brendshme politike, por e vërteta është se zhvillimet politike duhet me qenë në funksion të përmbushjeve së këtyre kritereve. Përmbushja e këtyre kritereve të akcesionit, nënkupton efekt të drejtpërdrejt të zhvillimeve brenda vendit”, tha Mazrekaj.

Nga ana tjetër, Arben Gashi, deputet i Kuvendit të Kosovës, anëtar i Komisionit për Integrime Evropiane, tha se për të ecur tutje drejt liberalizimit të vizave duhet të ketë një konsensus politike për çështjet të cilat kanë mbetur pezull e të cilat janë të rëndësishëm në këtë proces.

Ai mendon se nëse arrihet një konsensus brenda skenës politike, çështja e liberalizmit mund të trajtohet në instancat kompetente.

“Nëse mbetet pezull do të jetë problematike dhe do të ketë një argument shtesë nga Bashkimi Evropian për mos liberalizmin e vizave dhe po ashtu do të ketë një tension të vazhdueshme në Kosovë”, tha Gashi.

Kryeministri i Kosovës, Isa Mustafa ka pranuar se aktualisht koalicioni qeverisës nuk i ka votat e mjaftueshme për ratifikimin e marrëveshjes për Demarkacionin e kufirit me Malin e Zi.

Sa më shumë që ka probleme të brendshme politike në Kosovë dhe mos angazhim të duhur, çështja e liberalizimit të vizave do të vonojë, thotë profesor Emrush Ujkani, njohësi i çështjeve integruese evropiane.

“Askush nuk mund ta marr të sigurt faktin që nëse edhe në vitin tjetër vazhdohet kështu, do të thotë të mos adresohen çështjet, se mund të kemi një epilog më të mirë. Personalisht jam skeptik rreth kësaj edhe për vitin tjetër, apo edhe një kohë më të gjatë derisa kemi një konfuzion të tillë të brendshme nga lidershipi ynë”, tha Ujkani.

Kryeministri i Kosovës, Isa Mustafa, ka thënë këto ditë po ashtu se “mesazhet e Bashkimit Evropian janë të qarta dhe se liberalizmi i vizave për qytetarët e Kosovës është në duart tona”.

“Tashmë është në dorën tonë që t’i hapim udhë liberalizimit të vizave dhe të vazhdojmë më tutje në integrimin e plotë në BE, i cili është vullnet dhe aspiratë e qytetarëve të Kosovës”, ka shkruar kryeministri Mustafa së fundmi në rrjetin social Facebook.

Ndryshe, Komisioni Evropian ka ritheksuar se nuk ka liberalizim të vizave për kosovarët derisa nuk ratifikohet Demarkacioni me Malin e Zi dhe nuk tregohet efikasitet në luftën kundër krimit të organizuar dhe korrupsionit. Në të dy këto çështje autoritet vendore kanë ngecur.

Demarkacioni është bllokuar që nga 26 gushti i vitit 2015, pasi rebelimit të opozitës, e cila po beson se me marrëveshjen e nënshkruar në Vjenë Kosova po humbë tetë mijë hektarë tokë. Këtij mendimi i janë bashkuar edhe disa deputetë të koalicionit, të cilët ia kanë pamundësuar “koalicionit të elefantëve” ratifikimin e marrëveshjes me dy të tretat e votave, që i bije 80 nga 120 sa ka Kuvendi i Republikës së Kosovës.

---