Me 14 gola, lojtarët e Bajernit më të frytshmit në Botëror

Më së shumti gola ka shënuar Thomas Müller, për Gjermaninë, gjithsej 4. Pas tij vijnë Shaqiri për Zvicrën dhe Robben për Holandën, të dy nga tre gola

Bajerni nuk është vetëm kampion aktual dhe bartës rekord i titujve të kampionit të bundesligës gjermane të futbollit si dhe i titujve evropianë. Klubi i madh gjerman është deri më tash edhe ekipi, lojtarët e të cilit kanë shënuar më së shumti gola në Botërorin 2014 të Brazilit. Këtë e ka aritur edhe pse në ndeshjet e deritashme nuk janë angazhuar golgeterët tipikë të skuadrës.

Plot 14 gola kanë shënuar futbollistët e kombëtareve të ndryshme por që luajnë për FC Bayern. Kështu, më së shumti gola ka shënuar Thomas Müller, për Gjermaninë, gjithsej 4. Pas tij vijnë Shaqiri për Zvicrën dhe Robben për Holandën, të dy nga tre gola. Me 2 gola të shënuar për Kroacinë, në vazhdim vjen Mandzukic. Ndërsa nga një gol e kanë shënuar gjatë Botërorit në Brazil deri më tash lojtarët e Bajernit si Mario Götze (për Gjermaninë) dhe Julian Green (për SHBA).

Në vendin e dytë sipas ekipeve vjen Barcelona me 10 gola dhe Manchester United me 8 gola të shënuar nga lojtarët e tyre për kombëtaret e ndryshme.

Nëse sukseset bazuar në golat e shënuar i shikojmë sipas ligave ku luajnë lojtarët përkatës, bundesliga dhe Premierliga angleze mbajnë vendin e parë me nga 31 gola. Pas tyre vjen Liga spanjolle me 23 gola.