Mbushet aeroporti i Prishtinës pak orë pas liberalizimit të vizave

Kryeministri i Kosovës, Albin Kurti, ishte i pranishëm në aeroportin e Prishtinës, i cili i uroi qytetarët e Kosovës për heqjen e kësaj padrejtësie

Qytetarët e Kosovës nga sot nuk do ta kenë të detyrueshme pritjen para ambasadave, atyre u duhet të presin vetëm për verifikimin e pasaportave, matja e kilogramëve të valixheve, e të përgjigjen në pyetjet që drejtohen nga punëtorët në aeroportin e Prishtinës.

Qindra qytetarë kishin zënë hapësirat brenda dhe jashtë ndërtesës së aeroportit “Adem Jashari” në Prishtinë. E ky aeroport që tash e 59 vite prej themelimi të tij nuk ishte frekuentuar asnjëherë sikur sot, raporton albinfo.ch.

1 janari i 2024-ës i gjeti kosovarët duke ngre dolli për ndërrimin e vitit, e që në të njëjtën ditë u ishte shtuar edhe një arsye tjetër që të festojnë edhe për liberalizimin e vizave prej së vërteti, pasi që në të kaluarën u bënë thirrje që të festohet për një gjë të tillë, por këto thirrje shumë shpejt rezultonin që ishin të pavenda.

Urimet për liberalizimin e vizave nuk munguan nga ekzekutivi, madje kryeministri i Kosovës, Albin Kurti, ishte i pranishëm në aeroportin e Prishtinës, i cili i uroi qytetarët e Kosovës për heqjen e kësaj padrejtësie.

“Kemi pritur shumë gjatë, nga sot po hiqet një padrejtësi. Qytetarët tanë tashmë do të mund të lëvizin në 32 vende. Sot do të udhëtojnë për në Vjenë 50 qytetarë të cilët kanë fituar këtë mundësi në kuadër të fushatës tonë. Të respektojnë kriteret, dhe kudo që të udhëtojmë mos të harrojmë se shtëpia jonë është Kosova. Urime viti i ri dhe për herë të fundit urime liberalizimi i vizave”, tha Kurti në Aeroportin “Adem Jashari”.

Vendimi për liberalizimin e vizave për Kosovën është nënshkruar më 19 prill në selinë e Parlamentit Evropian, ani pse të gjitha kushtet i kishte përmbushur që nga viti 2018.

Shtetet që kosovarët mund të udhëtojnë pa viza janë: Austria, Belgjika, Bullgaria, Kroacia, Qipro, Republika Çeke, Danimarka, Estonia, Finlanda, Franca, Gjermania, Greqia, Hungaria, Italia, Letonia, Lituania, Luksemburgu, Malta, Holanda, Polonia, Portugalia, Rumania, Sllovakia, Sllovenia, Suedia, Zvicra, Norvegjia, Lihtensteini dhe Islanda.

 

---