Mbi gjysma e zviceranëve përkrahin barazinë e të huajve

Te personat me shkollim të kryer fillor, përqindja është vetëm 41.4% ndërsa te ata me shkollim të lartë dhe universitar. 74.3% të tyre shprehen në të mirë të kësaj barazie

Një sondazh i realizuar nga Zyra Federale për Migracion (BFM) ka ardhur në përfundimin se një shumicë e vogël e zviceranëve shprehen në favor të të drejtave të barabarta të të huajve me vendësit. Qëndrim të tillë kanë 55.7 për qind të pjesëmarrësve në anketë.

Siç  edhe pritej, të anketuarit me prejardhje të huaj janë shprehur me shumicë më të madhe, gjegjësisht 70.7% për një barazi të tillë. Sondazhi tregon se të rinjtë janë dukshëm më të hapur se të moshuarit sa i përket barazisë së shanseve të të huajve. Në mesin e të rinjve nga 16 deri 24 vjeçarë 69.5 për qind janë për barazinë. Nga ana tjetër më së paku, ose vetëm 45% e favorizojnë barazinë e të huajve personat e anketuar të moshës mbi 65 vjeçare.

Dallimet në qëndrim sa i përket barazisë së të huajve janë të mëdha edhe kur është në pyetje shkollimi i të anketuarve. Kështu, te personat me shkollim të kryer fillor, përqindja e ithtarëve të barazisë së të huajve është vetëm 41.4%. Krejtësisht ndryshe është kjo përqindje te personat me shkollim të lartë dhe universitar. 74.3% të tyre shprehen në të mirë të kësaj barazie.

Ndryshime të mëdha janë vënë re edhe në mes të regjioneve. Në regjionin e Cyrihut dhe atë të Zvicrës veriperëndimore në mesin e zviceranëve pa prejardhje të huaj ka më së shumti, gjegjësisht 60% përkrahës të barazisë së të huajve     

Sondazhi është bërë me pjesëmarrjen e rreth 17 mijë të anketuarve