Mbi 15 mijë votues në diasporë

Rreth 15 mijë veta është numri i qytetarëve të Maqedonisë në diasporë të regjistruar për të drejtën e votës për zgjedhjet e parakohshme parlamentare të 27 prillit

Kjo shifër jozyrtare është bërë e ditur  për albinfo.ch nga zyrtarë të lartë nga Komisioni Shtetëror i Zgjedhjeve (KSHZ).

Sipas të dhënave të fundit, për njësinë 7 – Evropë janë regjistruar mbi 10 mijë votues për të shfrytëzuar të drejtën e votës, për njësinë 8 – Amerikë janë paraqitur 2300 votues dhe njësinë e 9 në Australi janë paraqitur 1050 votues. 

Jozyrtarisht mësohet se numri më i madh i votuesve në Evropë janë shqiptarë dhe se në këtë njësi është mëse e sigurt fitorja e kandidatit shqiptar.

Por situata ndryshon në SHBA, ku nuk janë pritjet dhe rrezikohet fitorja e kandidatit shqiptar. Burime shqiptare nga KSHZ theksuan se numri i votuesve shqiptarë në SHBA, Kanada dhe Amerikën Latine është mbi 1000.

Nënkryetari i KSHZ-së, Subhi Jakupi deklaroi për Albinfo.ch se po vazhdon procesi i regjistrimit të kërkesave që janë dorëzuar nëpër përfaqësitë diplomatike dhe kërkesat e mbërritura përmes formës elektronike deri ditën e 30 prillit, kur skadoi afati i regjistrimit të votuesve në diasporë.

“Është në proces e sipër përfundimi i listës së diasporës për zgjedhjet e parakohshme parlamentare dhe se në fund të jepet edhe shifra finale, kur do të konfirmohet edhe numri i trupit votues për zgjedhjet e parakohshme parlamentare. Deri tani s`kemi shifra zyrtare edhe sa i përket aspektit të votuesve sipas përkatësisë etnike”, theksoi Jakupi.

Ndërkohë, për zgjedhjet presidenciale është mbyllur lista e votuesve, me ç`rast 1,7 milionë qytetarë janë me të drejtë vote.

Sipas zëvendëskryetarit të KSHZ-së, Suhbi Jakupi për zgjedhjet presidenciale në diasporë të drejtën e votës do ta kenë 8.332 qytetarë, që janë paraqitur të votojnë në përfaqësitë diplomatiko-konsullare (PDK).

Edhe atë në njësinë zgjedhore “7” që i pëfshin vendet evropiane dhe Afrikën janë paraqitur për votim 5.892 shtetas të Maqedonisë, në njësinë zgjedhore “8” – Amerika dhe Amerika Latine – 1.426 dhe në njësinë zgjedhore “9” Azia dhe Australia – 1.014.

Sipas tij, në 13 vendvotime jashtë vendit nuk do të mbahet votim sepse atje janë paraqitur më pak se 10 shettas për votim edhe në Kajro, Athinë, Doha, Talin, varshavë, Selanik, Budapest, Tel-Aviv, Moskë, Madrid, Kiev, Oslo, Nju-Delhi.

Ndërkohë, KSHZ akoma nuk ka bërë zyrtare listën e votuesve për zgjedhjet e parakohshme parlamentare.