Masa për zbutjen e mungesës së fuqisë profesionale punëtore

Këshilli Federal potencialin më të madh të fuqisë punëtore aktualisht të munguar e sheh te inkuadrimi në punë i grave të cilat nuk punojnë ose kanë një vend pune me orar të shkurtë

Qeveria Federale e Zvicrës është mobilizuar për luftimin e mungesës së fuqisë së kualifikuar punëtore. Kjo mungesë konsiderohet se do të vijë si rezultat i pranimit të iniciativës kundër migrimit masiv në referendumin e mbajtur vitin e kaluar.

Me këtë synim, me qeveria planifikon marrjen e 30 masave të ndryshme në kuadrin e asaj që quhet “iniciativa e fuqisë punëtore profesionale” që duhet të amortizojë goditjen e iniciativës kundër migrimit masiv.

Në këtë kontekst, Këshilli Federal potencialin më të madh të fuqisë punëtore aktualisht të munguar e sheh te inkuadrimi në punë i grave të cilat nuk punojnë ose kanë një vend pune me orar të shkurtë, ka thënë sot ministri i ekonomisë Johann Schneider-Ammann. Ekzekutivi i vendit prandaj synon të promovojë përputhshmërinë në mes të profesionit dhe familjes.

Ai po ashtu është duke shqyrtuar mundësinë që për të realizuar këtë qëllim, të ulë tatimin nga kostoja e përkujdesjes për fëmijët.

Edhe kantonet janë marrë sot me problemin e kufizimit të hyrjes së fuqisë së huaj punëtore në Zvicër, shkruan srf.ch. Ato pranojnë të bartin në parim konsekuencat e votimit të iniciativës kundër migracionit masiv gjegjësisht futjen e kontingjenteve. Por ato kërkojnë të kenë të drejtë ndërhyrjeje në përcaktimin e kontingjenteve.

Konferenca e qeverive të kantoneve përshëndet përjashtimin nga kontingjentet të të huajve që qëndrojnë deri në katër muaj.