Maqedoni: Kriteret e rrepta për hyrje, reagojnë mërgimtarët

Kaluan në shumë kufijë nga e gjithë Evropa, por u duhet të presin në prag të shtëpisë. Shtetasit tanë vazhdojnë të kenë telashe për t’u rikthyer në vendlindje shkaku i mbylljes së kufijve, raporton AlsatM.

“Maqedonia, si vendi i vetëm në Evropë me kufij të mbyllur për shtetasit e tyre, edhe pse kanë teste negative, duhet të mbahen në vetizolim shtëpiak prej 2 javësh. Ndërkaq, të huajt transitojnë lirshëm nëpër territorin tonë”.

Po ashtu në vendkalimin e Tabanocës pritjet janë të gjata për ata që duhet të dërgohen në karantinë shtetërore.

“Prej Zvicrës, Austrisë, Gjermanisë, Kroaci e Serbi pa asnjë problem, as maska, asgjë. Këtu vetëm të marrin nga 20 euro për maska. Do na çojnë edhe në karantinë të na i marrin nga 2 mijë denarë atje”, u shpreh Nafi Limani, mërgimtar.

“Prej 4 të mëngjesit jemi këtu duke pritur dhe askush nuk na udhëzon se çfarë do të bëj. Mos të maltretohemi këtu në rrugë pa ujë, pa bukë, pa asgjë. As një banjë nuk e keni këtu”, tha Fatmir Jakupi, mërgimtar.

Shtetasit që kanë PCR testet hynë, por problemet e tjera shëndetësore i kanë bërë të harrojnë pandeminë. Thonë se kanë mbetur të izoluar në vendet prej nga vijnë më shumë se 3 muaj.

“Jam me diabet dhe me tension të lartë të gjakut, këta njerëzit i mendojnë këto. Erdhëm nëpër të gjitha shtetet, kurse si në vendin tonë askush tjetër nuk na bëri kështu”.

“Në rregull nuk është aspak, se kur arritëm këtu thanë që testin mund ta bëjmë shpejt për disa orë. Edhe na thanë se nxitoni se do të niset autobusi, prej ora 8 të mëngjesit presim këtu”.

Vendimi i fundit të Qeverisë për hapjen e të gjitha pikave kufitare nuk ka hequr asnjë nga masat restriktive të hyrje-daljes nga shteti, masë e cila ka qenë në fuqi gjatë gjithë kohës së pandemisë.

Me përcjellje policore këta shtetas do të çohen në karantinë shtetërore deri sa të marrin një rezultat negativ të CoVid-19. Por edhe nëse kanë test negativ, ata do të izolohen për 2 javë në shtëpi.