Majlinda, ambasadore e organizatës ‘Care For Kosovo Kids’

Majlinda Kelmendi është emëruar ambasadore e organizatës “Care For Kosovo Kids”, ku do të ndihmojë në fushatën për të ndihmuar fëmijët që mjekohen nga kanceri dhe leukemia

Majlinda Kelmendi kampione në fushë dhe jashtë saj. Ajo ka treguar edhe një herë anën humane, duke ndihmuar lëmojë të cilët janë të prekur nga kanceri dhe leukemia, shkruan albinfo.ch.

Majlinda është emëruar ambasadore e organizatës “Care For Kosovo Kids”, ku do të ndihmojë në fushatën për të ndihmuar fëmijët që mjekohen nga kanceri dhe leukemia në Klinikën e Pediatrisë në QKUK.

Ajo ka thënë se është e nderuar që është bërë ambasadore e kësaj shoqate. “Secili njeri në Kosovë dhe jashtë Kosovës më thotë që je ambasadore e Kosovës, kështu që ideja me qenë ambasadore e kësaj shoqate dhe me pas mundësi me ju ndihmua këtyre fëmijëve që kanë nevojë besoni që është ndjenja më e mirë që po e përjetoj”, është shprehur xhudistja pejane.

Për të ndihmuar këta fëmijë, 25-vjeçarja vendosi në ankand simbolin që mbante në shpinë në Lojërat Olimpike Rio 2016, ku shkruan emri i saj dhe vendi nga vjen.