Lorian Musa, për të dytin vit radhazi, kampion në “Lion Cup”

Në Luksemburg, një nga garat më të rëndësishme ndërkombëtare të karatesë, Lorian Musa u shpall kampion i kategorisë U16/ -57kg, për të dytin vit me radhë

Të shtunën, më 27 shtator 2025 Lorian Musa, karatisti 15-vjeçar që stërvitet në karaté club Valais në Sion dhe përfaqëson ekipin kombëtar të Zvicrës (SKL), ka arritur një tjetër sukses të madh në arenën ndërkombëtare të karatesë.

Në turneun prestigjioz “Lion Cup” të mbajtur në Luksemburg, një nga garat më të rëndësishme ndërkombëtare të këtij sporti, Lorian Musa u shpall kampion i kategorisë së tij U16/ -57kg, duke fituar vendin e parë për të dytin vit me radhë, shkruan albinfo.ch.

Paraqitja e tij u vlerësua lart nga juria dhe publiku, falë shpejtësisë, qartësisë taktike dhe teknikës së avancuar që e karakterizojnë stilin e tij të garimit. Përmes një kombinimi të disiplinës dhe talentit, ai tregoi edhe një herë se është një prej sportistëve më premtues të karatesë evropiane në moshën e tij.

Ky sukses është rezultat i një pune të gjatë e të përkushtuar, me orë të shumta stërvitjeje dhe përgatitjeje profesionale.

Trajnerët e tij në karaté club Valais dhe drejtuesit e ekipit kombëtar zviceran theksojnë se Loriani është shembull i një sportisti që po rritet në mënyrë të qëndrueshme dhe po ndërton një karrierë të suksesshme në karate.

---