Leander Veizi, drejtori i ri artistik i Theater Regensburg në Gjermani

Balerini dhe koreografi shqiptar nis një kapitull të ri në karrierën e tij artistike, duke udhëhequr trupën e vallëzimit të teatrit gjerman.

 

Koreografi dhe balerini shqiptar Leander Veizi do të marrë një rol të ri drejtues në karrierën e tij artistike, pas emërimit si drejtor artistik dhe koreograf i kompanisë së vallëzimit në Theater Regensburg, shkruan albinfo.ch.

Me fillimin e sezonit të ri artistik, 37-vjeçari do të udhëheqë trupën e vallëzimit të teatrit gjerman, ndërkohë që deri në përfundim të sezonit aktual do të vazhdojë të performojë si balerin aktiv.

Në një deklaratë, Veizi e përshkroi këtë moment si një fazë të rëndësishme tranzicioni në jetën profesionale. “Ky është momenti kur shumë balerinë fillojnë të orientohen drejt koreografisë dhe roleve të tjera artistike, duke kaluar gradualisht nga performanca aktive në skenë drejt krijimit dhe drejtimit artistik,” theksoi ai.

Balerini shtoi se mezi pret pesë muajt e fundit si performues aktiv dhe mundësinë për të nisur një kapitull të ri së bashku me ekipin e teatrit. “Vlerësoj shumë punën në ekip dhe mendimin komunitar, si dhe gëzimin për të krijuar gjëra të reja duke u mbështetur në traditë. Për këtë teatër, që e çmoj shumë, synoj të zhvilloj një vizion artistik ndërdisiplinor së bashku me trupën e vallëzimit,” u shpreh Veizi.

Emërimi i tij konsiderohet një hap i rëndësishëm në karrierën e artistit dhe një kontribut i ri në zhvillimin e artit të vallëzimit në skenën europiane./Albinfo.ch

 

---