LAPSH “Naim Frashëri” në Cyrih uron për 7 Marsin

Lidhja e Arsimtarëve dhe Prindërve Shqiptarë ”Naim Frashëri” për çdo vit feston ditën e mësuesit, e cila na përkujton 7 Marsin e vitit 1887 kur në Korçë filloi punën mësonjëtorja e parë shqipe, nën drejtimin e Pandeli Sotirit. Kjo shkollë kishte karakter kombëtar ku të gjitha mësimet jepeshin në gjuhën shqipe dhe mësuesit e saj ishin figura të njohura të Rilindjes Kombëtare, përcjell albinfo.ch

“Duke kujtuar këtë ditë të 7 Marsit nuk mund të mos nderojmë edhe kontributin e mësuesve të palodhur dhe prindërve, që me vetëkontribut mbajnë të hapur Shkollën shqipe të mësimit plotësues në mërgatë.
Lidhja e Arsimtarëve dhe Prindërve Shqiptarë ”Naim Frashëri” këtë vit mbush 30 vjet, në përpjekjet e saj për ta ruajtur dhe zhvilluar gjuhën shqipe tek fëmijët tanë, të cilët po rriten jashtë Atdheut.”

LAPSH u uron të gjithë nxënësve, prindërve dhe atyre që me donacionet e tyre po e mbështetin Shkollën shqipe të mësimit plotësues.
“Veçanërisht urojmë të gjithë mësueset, mësuesit dhe veteranët kudo që janë, të cilët po përhapin dritën e diturisë tek brezi i ri i kombit tonë”, thuhet në urim.