Ky shtet realizon film për sulmin në Banjskë, së shpejti premiera

Ky shtet sjell në ekran sulmin terrorist në Banjskë përmes filmit “Në Errësirën e Diellit – Kosova”

Turqia ka finalizuar prodhimin e një filmi që trajton një nga ngjarjet më tronditëse dhe të ndjeshme të viteve të fundit në Kosovë — sulmin terrorist në Banjskë, të kryer nga grupe paramilitare serbe më 24 shtator 2023, transmeton albinfo.ch. 

Filmi, me titull “Në Errësirën e Diellit – Kosova”, do të shfaqet premierë më 5 shtator 2025 në kinematë e Turqisë dhe më pas pritet të publikohet edhe në Kosovë dhe në vendet e tjera të Ballkanit.

Ky projekt kinematografik është rezultat i bashkëpunimit mes profesionistëve të njohur turq të industrisë së filmit dhe synon të ofrojë një rrëfim dramatik, emocional dhe vizualisht të fuqishëm mbi ngjarjen që tronditi jo vetëm opinionin publik kosovar, por edhe më gjerë.

Detajet për kastën dhe skenarin mbeten të konfidenciale, megjithatë është bërë me dije se filmi do të përqendrohet në historitë njerëzore brenda ngjarjes, pasojat shoqërore dhe politike, si dhe mesazhin për qëndresë dhe drejtësi.

Ky është një prej filmave të parë ndërkombëtarë që trajton drejtpërdrejt një ngjarje kaq të afërt dhe të dhimbshme për Kosovën, duke shënuar një kapitull të ri në mënyrën se si arti dhe kinematografia reflektojnë mbi konfliktet dhe traumën kolektive.

---