Kuvendi i Kosovës i kthehet punës, opozita kërcënon me bllokim

Pushimi i fundvitit nuk i ka ndryshuar qëndrimet e grupeve parlamentare. Opozita tashmë po kërkon zgjedhje të parakohshme

Pas një pauze tri javore, Kuvendi i Kosovës e nis sot sesioni pranveror, nën kërcënimin e deputetëve opozitarë për bllokim seancash. Seancën e radhës pritat ta caktoj Kryesia e Kuvendit në mbledhjen e nesërme, ndërsa ky vit konsiderohet më i vështiri për institucionet vendore.

Sipas nenit 37 të Rregullores së punës së Kuvendit, në pjesën e dytë të muajit janar fillon sesioni pranveror i Kuvendit. Por, pushimi i fundvitit nuk i ka ndryshuar qëndrimet e grupeve parlamentare. Madje blloku opozitar ka forcuar idenë, që ta bllokojë Kuvendin derisa vendi të shkoj në zgjedhje të reja.

Shefi i grupit parlamentar të Partisë Demokratike të Kosovës, Adem Grabovci tha se sesioni i ri i punës së Kuvendit do të nisë ditët në vijim, ndërsa shtoi se janë në pritje të marrjes së ftesës për mbajtjen e mbledhjes së Kryesisë, për të caktuar mbajtjen e seancës së parë plenare për vitin 2016.

Grabovci tha se, presin një sesion më të qetë parlamentar, duke ftuar opozitën që të kthehet dhe të paraqesë qëndrimet e saj nëpërmjet diskutimeve në Kuvend, pasi, sipas Grabovcit, vetëm përmes dialogut sjellin vendime të drejta në interes të qytetarëve.

Por, shefja e grupit parlamentar të Aleancës për Ardhmërinë e Kosovës, Donika Kadaj-Bujupi është shprehur e vendosur, që opozita të vazhdojë bllokimin e Kuvendit, derisa të merret vendim për zgjedhjet e parakohshme.

Deputetja Kadaj-Bujupi i ka thënë TCH se për metodat dhe mënyrën sesi do të veprojë opozita për bllokimin e Kuvendit, apo me çfarë mjetesh do ta bllokojë punën, do të vendosin në momentin e caktimit të datës së seancës së re.

Ndryshe, sesioni pranveror vazhdon me miratimin e projektligjeve nga sesioni i vjeshtës së vitit të kaluar.

Mirëpo për shkak të dy marrëveshjeve që kryeministri Isa Mustafa dhe zëvendësi i tij, Hashim Thaçi i nënshkruan me Serbinë dhe Malin e Zi, Kosova rrëshqiti në një krizë parlamentare që e përcolli gjatë gjysmës së vitit të kaluar. E rrjedhimisht nga analistët  politikë kosovarë, sesioni vjeshtor i Kuvendit të Kosovës është konsideruar i dështuar.

Por, ky viti konsiderohet edhe më i vështirë, për institucionet edhe në veçanti për Kuvendin e Kosovës. Brenda javësh Parlamenti i Kosovës pritet ta miratoj marrëveshjen me Holandën për lokacionin e Gjykatës Speciale, ndërsa gjatë këtij viti pritet të ngritën aktakuzat e para për krime lufte.