Kurti takohet me Abottin: Sundimi i ligjit në veri është i domosdoshëm

Mbrëmë, kryeministri i Republikës së Kosovës, Albin Kurti, takoi ambasadorin e Mbretërisë së Bashkuar në Kosovë, Nicholas Abbott, me të cilit bëhet e ditur se diskutuan për zhvillimet aktuale, me theks situatën e fundit në veri të vendit, rëndësinë për deeskalim të plotë dhe rrugën përpara, përcjell albinfo.ch.

Nga zyra e kryeministrit njoftojnë se Kurti theksoi që sundimi i ligjit duhet të jetë parimi bazë për të ecur përpara.

“Vendosja e plotë e sundimit të ligjit në katër komunat në veri të Kosovës është e domosdoshme si për largimin e elementeve kriminale, ashtu edhe për një fushatë të hapur dhe fer para zgjedhjeve të lira e demokratike në të ardhmen”, thuhet në komunikatën për media.

Kurti po ashtu falënderoi Abbottin për angazhimin dhe bashkëpunimin e tij të vazhdueshëm në thellim dhe fuqizim të marrëdhënieve dypalëshe ndërmjet Republikës së Kosovës dhe Mbretërisë së Bashkuar.