Kurti: Ushtria jonë vijon të modernizohet

Kurti: S’e forcojmë ushtrinë për të sulmuar të tjerët, por për ta mbrojtur veten

Diplomohen 15 kadetë të rinj të Forcës së Sigurisë së Kosovës. Kryeministri i Kosovës, Albin Kurti, në fjalën e tij në ceremoninë e diplomimit, shprehu krenarinë për zhvillimin dhe modernizimin e ushtrisë. Ai u shpreh se diplomimi i kadetëve jep shpresa për të ardhmen dhe e bën krenar për të kaluarën.

Më tej Kurti theksoi se Kosova ka ndërtuar një sistem të qëndrueshëm të edukimit ushtarak, që është një hallkë e rëndësishme e zhvillimit të forcës së vendit.

“Diplomimi i sotëm na jep shpresë për të ardhmen dhe na bën krenarë për të kaluarën.

Nga shkollimi në flakë të luftës në fazat e shtetformimit, ushtria jonë vijon të modernizohet. Kemi ndërtuar sistem të qëndrueshëm të edukimit ushtarak, hallkë e rëndësishme e zhvillimit të forcës sonë. Burimet njerëzore janë boshti kurrizor i çdo ushtrie, e personeli i trajnuar dhe edukuar, bazë për zhvillimin profesional të mbrojtjes”, tha Kurti.

“Ne nuk e forcojmë ushtrinë për të sulmuar të tjerët, por për të qenë mjaftueshëm të fortë për të mbrojtur vetveten. Për një Kosovë më të sigurt, më të drejtë dhe të barabartë për të gjithë”, është shprehur Kurti.

---