Kurti kërkon dorëheqjen e Haradinajt, Veselit e Hoxhës

I pari i Lëvizjes Vetëvendosje, Albin Kurti ka kërkuar dorëheqjen e Kryetarit të Kuvendit, Kadri Veselit, Kryeministrit Ramush Haradinaj dhe Ministres së Integrimeve Europiane Dhurata Hoxha.

Kurti përmes një postimi në rrjetin social Facebook, ka thënë se ishin Haradinaj, Veseli e Hoxha që dhanë data për liberlizimin e vizave.

“Për herë të parë një zyrtar i lartë i BE-së përmendi datë për liberalizimin e vizave në Kosovë. Komisioneri për Fqinjësi Evropiane dhe Negociata për Zgjerim, Johannes Hahn, foli e tha: viti 2020! Datat e mëhershme për liberalizim në vitin 2018, i kishin premtuar veçse Ramush Haradinaj, Kadri Veseli dhe Dhurata Hoxha. Të tre këta duhet të japin dorëheqje”, ka shkuar Kurti.

Ai nuk la pa përmendur edhe marrëveshjen e demarkacionit mes Kosovës dhe Malit të Zi. 

“Po ashtu, ky pushtet ia ka borxh 8.200 hektarë shtetit tonë, të cilat ia dha Malit të Zi. E sa për Thaçin, ai mbase tashmë po negocion për liberalizim të vizave për Rusi. Me këta njerëz po na largohet Evropa e po na rrudhet Kosova”, ka shkruar tutje Kurti.