Kurti: Kemi dorëzuar listën, unë jam bartës i saj

©Zyra e Kryeministrit

Pasiqë Këshilli Gjyqësor i Kosovës njoftoi Komisionin Qendror të Zgjedhjeve (KQZ) për kandidatët që nuk mund të garojnë për deputetë në zgjedhjet e 14 shkurtit, u raportua se edhe kreu i Lëvizjes Vetëvendosje, Albin Kurti, nuk mund të kandidojë për deputet në këto zgjedhje të parakohshme.

Nga ana tjetër, Kurti sot ka thënë se është dorëzuar lista dhe ajo është lista e Vetëvendosjes. Ai ka theksuar se ai është bartës i listës e që respekton dhe i përfill në përpikëri Kushtetutën dhe ligjet e Kosovës.

“Ne kemi dorëzuar listën tonë, ashtu siç është kërkuar dhe ajo është lista jonë. Para një viti ka qenë ambasadori Grenell për një darkë me ish-presidentin, por ai është viti i kaluar. Mendoi që institucionet e shtetit duhet të update-ohen në rrethana të reja, ku jemi në prag të zgjedhjeve të 14 shkurtit, zgjedhje këto që kanë ngjallur një entuziazëm të paparë për pjesëmarrje masive të qytetarëve. Unë jam bartës i listës, i cili respekton dhe i përfill me përpikshmëri Kushtetutën dhe ligjet, të cilat mbrojnë të drejtat e të gjithë neve dhe secilit prej nesh”, tha Kurti pas homazheve që bëri te varri i ish-presidentit Ibrahim Rugova në 15-vjetorin e vdekjes së tij.