Kurrë më pak aksidente në transportin publik

Gjatë vitit 2015 në trafikun publik në Zvicër kanë ndodhur gjithsej 183 aksidente dhe kanë humbur jetën 32 persona

Transporti  publik në Zvicër po bëhet nga viti në vit gjithnjë më i sigurt. Siç tregojnë të dhënat më të reja të publikuara sot nga Zyra Federale për Trafik (BAV) në një raport mbi sigurinë, gjatë vitit 2015 në trafikun publik në Zvicër kanë ndodhur gjithsej 183 aksidente.

Ky është numri më i ulët i regjistruar deri tash i aksidenteve. Statistikat rreth këtij numri mbahen prej nëntë vitesh, shkruan albinfo.ch

Gjatë vitit të kaluar, në trafikun publik kanë humbur jetën 32 persona, në mesin e të cilëve dy udhëtarë, të cilët kanë vdekur nën rrotat e tramvajit. Ndërsa te numri më i madh i rasteve të vdekjes bëhet fjalë për persona që kanë hyrë vetë në binarë të trenit ose për kalimtarë dhe ngasës të pakujdesshëm veturash, tregon BAV.