Kur mund të hapen kufijtë e zonës Schengen

Kriza e koronavirusit ka nxjerrë në pah "fatin e përbashkët" të Zvicrës dhe vendeve të Bashkimit Evropian, i cili tani duhet të vazhdojë të punojë së bashku, thonë ambasadorët francezë dhe gjermanë në Bernë

Pas tensioneve në ditët e para të krizës, kur secili shtet mori masat e veta kombëtare të urgjencës, Zvicra, Gjermania dhe Franca kanë zhvilluar “solidaritet të admirueshëm”, shkruajnë ambasadori francez Frédéric Journès dhe ambasadori gjerman Norbert Riedel në një pjesë të përbashkët të botuar të Premten në gazetat “Anzeiger” dhe “Le Temps”.

Ata përmendin si shembuj spitalet zvicerane dhe gjermane, që marrin pacientë me koronavirus nga Franca, dhe gjithashtu bashkëpunimin për riatdhesimin e qytetarëve të bllokuar nga e gjithë bota, përcjell albinfo.ch.

Shtetasit zviceranë janë dërguar në shtëpi me fluturime franceze dhe gjermane dhe anasjelltas.

Ky bashkëpunim tani duhet të mbahet për të rikthyer jetën ekonomike në rrugë të mbarë, thonë ambasadorët, duke kërkuar një “rihapje të koordinuar të kufijve”.

Mesazhi i tyre pasqyron gjerësisht pikëpamjen e dhënë nga Ministri i Jashtëm Zviceran, Ignazio Cassis muajin e kaluar, përcjell tutje albinfo.ch.

“Kjo periudhë e jashtëzakonshme na kujton se, përkundër dallimeve tona, ne jemi të gjithë evropianë”, shkruajnë ata. “Përgjigja evropiane ndaj kësaj krize, pavarësisht nëse kritikët pëlqejnë apo jo, është e pashembullt. Asnjëherë më parë, Bashkimi Evropian nuk ka mobilizuar burime të tilla të konsiderueshme në vetëm disa javë. Dhe kurrë më parë nuk jemi ndërgjegjësuar për rëndësinë e vlerave tona të përbashkëta, veçanërisht respektimin e lirisë individuale dhe sundimit të ligjit”.

Këtë javë Ministrat e Drejtësisë dhe Punëve të Brendshme të shteteve Shengen të Evropës ranë dakord unanimisht për një ngritje të koordinuar hap pas hapi të kufizimeve të udhëtimit, ndërsa riafirmuan përparësinë e mbrojtjes së qytetarëve kundër virusit.

“Fillimisht, rihapja progresive e kufijve të brendshëm të Evropës duhet të bëhet. Vetëm pas kësaj do të jetë e mundur një rihapje hap pas hapi i kufijve të jashtëm të Shengenit për të lejuar hyrjen e njerëzve nga shtetet e treta”, tha ministria zvicerane e drejtësisë.

 

---