Kryetari i Prizrenit, vet i pesti, akuzohet për korrupsion

EULEX-i ka ngritur aktakuzë kundër kryetarit të Prizrenit, Ramadan Muja dhe pesë zyrtarëve të tjerë të kësaj komune

Edhe një kryetar tjetër komune akuzohet se ka vepruar mbi ligjet, por edhe duke shfrytëzuar autoritetin për t’u pasuruar. Ai është profesori universitar, Ramadan Muja, kryetari i Prizrenit, ndaj të cilit Prokuroria Speciale ka konfirmuar ngritjen e aktakuzës.

Sipas një njoftimi, është një prokuror ndërkombëtar i EULEX-it i cili ka ngritur aktakuzë për korrupsion në Gjykatën Themelore të Prizrenit kundër Mujës dhe pesë zyrtarëve tjerë të të njëjtës komunë.

“Prokurori i ka ngritur akuzat kundër të pandehurve Ramadan Muja, Sadik Paçarizi, Avni Ademaj, Kadri Ukimeri, Abdullah Tejeci dhe Minir Krasniqi”, thuhet në njoftimin e EULEX-it.

Ramadan Mujës i bien në barrë katër pika të aktakuzës për keqpërdorim të pozitës zyrtare ose autoritetit.

Minir Krasniqi akuzohet në dy pika të aktakuzës për keqpërdorim të pozitës zyrtare ose autoritetit, Kadri Ukimeri, Avni Ademaj, Sadik Paçarizi dhe Abdullah Tejeci akuzohen secili në një pikë të aktakuzës për keqpërdorim të pozitës zyrtare ose autoritetit.

“Rasti përfshin pretendime për shfrytëzimin dhe përfitimin e kundërligjshëm nga toka që i takon Komunës së Prizrenit dhe vepra të tjera që kanë rezultuar me shkeljen e rëndë të drejtave të një numri të paditësve në konteste civile”, thuhet në kumtesën për informim të Misionit të BE-së për Sundim të Ligjit (EULEX).

Ndryshe, Muja është kryetari i katërt me radhë që akuzohet për vepra penale, korrupsion, kanosje apo edhe vozitje jashtë normales. Dy nga kryetarët (Xhemajli dhe Zharku) tashmë janë jashtë detyrës, njëri në arrati e tjetri duke pritur rigjykimin. Ndërsa njëri (Lushtaku) kishte mbajtur dënimin prej tre muajve dhe i është kthyer punës.