Kryetari i Kuvendit të Kosovës kërkon reagim nga BE dhe SHBA për vrasjen e policit në veri

Glauk Konjufca në Facebook

Kryetari i Kuvendit të Kosovës, Glauk Konjufca ka reaguar pas sulmit ndaj Policisë së Kosovës në veri, ku një polic është vrarë dhe një tjetër është plagosur.

Përmes një postimi në rrjetin social “Facebook”, Konjufca ka kërkuar nga Bashkimi Evropian dhe Shtetet e Bashkuara të Amerikës, ta dënojnë Serbinë për këtë siç tha ai, agresion të hapur kundër Kosovës, përcjell albinfo.ch.

“Ky është një sulm i drejtpërdrejt ndaj rendit kushtetues, ndaj veprimeve tona për rend dhe ligj dhe cenim i sovranitetit dhe sigurisë të vendit tonë. Prandaj, i kërkojmë fuqishëm faktorit ndërkombëtar, veçanërisht BE-së dhe SHBA-së që ta dënojnë Serbinë për këtë agresion të hapur kundrejt Kosovës”, ka shkruar ai.

Konjufca e ka ngushëlluar familjen e policit të vrarë.

“Në emër të Kuvendit të Republikës së Kosovës dhe në emrin tim i shpreh ngushëllimet më të sinqerta familjes së policit të vrarë, ndërsa policit të plagosur shërim sa më të shpejtë. Autorët e këtij krimi, urgjentisht të sillen para drejtësisë, ndërkaq i ftoj institucionet e drejtësisë të veprojnë menjëherë”, tha ai.