Kriza prek edhe Kosovën

Jeta e qytetarëve të Kosovës do të rëndohet edhe më tej për shkak të krizës në Eurozonë

Devalvimi i euros në raport me dollarin amerikan javëve të fundit, për njohësit e ekonomisë nuk është i rastësishëm, por thonë se kjo do të godas rëndë standardin e jetës së qytetarëve në Kosovë , raporton Express.

E, aq më tepër, kur institucionet e vendit nuk kanë asnjë lloj kontrolli mbi këtë valutë dhe prodhimi vendës është në nivelin më të ulët të mundshëm.

Bekim Marmullaku, ekonomist, shpjegon se kriza sociale do të fillojë me daljen e Greqisë nga Eurozona, e cila do t’i ketë efektet e menjëhershme në Bankën Qendrore Evropiane dhe në bankat e tjera komerciale në Evropë.

Sipas tij, efekti mund të jetë zinxhiror, sidomos në vendet periferike të Eurozonës, që edhe ashtu po përballen me mungesë të progresit ekonomik.

Duke marrë parasysh që pothuajse të gjitha produktet në Kosovë janë të importuara, atëherë rritja e çmimeve në vendet e origjinës do të manifestohej edhe me rritjen e çmimeve në tregun e Kosovës, që ai thotë se do të ndikojë menjëherë në standardin jetësor të qytetarëve.

Ngjashëm vlerëson se do të ndodhë edhe me shumicën e importeve nga vendet evropiane jashtë Eurozonës, sepse edhe ato gjithsesi janë të lidhura direkt ose jo me Eurozonën.

Për shkak të pasigurisë, thonë se edhe bankat komerciale në Kosovë, mund t’i rrisin kamatat e kredive, ose të hezitojnë në dhënien e tyre për bizneset kosovare, të cilat si kontribuuesit më të mëdhenj në buxhetin e Kosovës, mund të vijnë në situata të vështira afariste, që do të reflektojë edhe në rënien e shkallës së rritjes ekonomike në vend.

Edhe zyrtarët e Bankës Qendrore të Kosovës e pranojnë se devalvimi i valutës euro do të dobësonte fuqinë blerëse të konsumatorëve kosovarë, duke pasur parasysh mbështetjen e lartë të ekonomisë së Kosovës në importin e mallrave nga jashtë.

Besnik Kada, zyrtar për informim në BQK  pohon për Express se sa i përket vendeve të rajonit, siç janë Maqedonia e Serbia, prej të cilave Kosova importon një sasi të konsiderueshme të mallrave, lëvizjet në kursin e këmbimit, përkundrazi tregojnë për vlerësim të euros ndaj këtyre valutave, gjë e cila nënkupton rritje të fuqisë blerëse për konsumatorët kosovarë.

Megjithatë, Kada vlerëson se në periudhën e fundit euroja kishte një devalvim të moderuar kundrejt dollarit amerikan dhe kjo reflektohet në tregun kosovar nëpërmjet mallrave si nafta dhe gazi që në nivel global tregtohen në dollarë amerikanë.