Kriza mbyll hotelet luksoze në Greqi

Për shkak të krizës së rëndë ekonomike është mbyllur edhe një hotel i madh superluksoz në qendër të Athinës.

Bëhet fjalë për “Athens Imperial“, hotelin e tretë, pas “Fashion House” dhe “Classical Acropol”, të gjithë në qendrën historike të kryeqytetit grek, që falimenton brenda pak kohësh.

Tre hotelet në fjalë i përkasin grupit “Grecotel”, i cili në këtë mënyrë ka marrë një goditje të rëndë, njoftojnë agjencitë greke të lajmeve.

Pas këtij rasti, numri i hoteleve që kanë mbyllur dyert në dy vitet e fundit në Athinë ka kaluar 20.

Kriza financiare që ka përfshirë Greqinë ka goditur rëndë turizmin grek, që ishte një nga burimet kryesore të fitimeve në shtetin helen.

Kjo ka bërë që çmimet turistike në Greqi të bien në minimum, madje edhe nëpër ishujt me ujërat e kristalta, që deri para pak vitesh ishin ekskluzivitet i pasanikëve.