Kreu i NATO-s takon Kurtin e Vuçiqin para raundit të ri të bisedimeve

Më 17 gusht Sekretari i Përgjithshëm i NATO-s, Jens Stoltenberg do të mbajë takime të ndara në Bruksel me Kurtin e Vuçiqin.

Një ditë para raundit të ri të dialogut ndërmjet Kosovës dhe Serbisë në Bruksel më 18 gusht të ndërmjetësuar nga Bashkimi Evropian, kryeministri i Kosovës, Albin Kurti dhe presidenti i Serbisë do të priten në takime të ndara nga kreu i NATO-s.

Më 17 gusht, Sekretari i Përgjithshëm i NATO-s, Jens Stoltenberg, do të mbajë takime të ndara në Bruksel me kryeministrin e Kosovës, Albin Kurti, dhe presidentin e Serbisë, Aleksander Vuçiq, përcjell Albinfo.ch.

Sipas njoftimit për media nga aleanca ushtarake e NATO-s, Stoltenberg fillimisht do të takohet me Vuçiqin dhe më pas me Kurtin.

Pas çdo takimi të ndarë janë paraparë të mbahen edhe konferenca për media.

Ky takim me Stoltenbergun do të mbahet tri javë pas rritjes së tensioneve në veri të Kosovës, ku serbët lokalë bllokuan rrugët që çojnë në pikëkalimet kufitare – Jarinjë dhe Bërnjak – që lidhin Kosovën dhe Serbinë, për të shprehur kundërshtimin e tyre lidhur me vendimet e Prishtinës për targat dhe dokumentet serbe./Albinfo.ch/

---