KQZ: Numërohen 75% e votave nga përfaqësitë diplomatike

Rezultatet e para nga votat e diasporës: LVV kryeson me mbi 87 për qind

Komisioni Qendror i Zgjedhjeve (KQZ), në përditësimin e fundit të bërë më 3 janar në ora 08:25, ka bërë të ditur se janë publikuar rezultatet e 75 për qind të votave të hedhura në përfaqësitë diplomatike të Kosovës jashtë vendit, transmeton albinfo.ch.

Sipas KQZ-së, deri tani janë numëruar 30 nga gjithsej 40 kuti të votimit, që përfaqësojnë votat e diasporës të hedhura në ambasada dhe konsullata.

Nga këto rezultate paraprake, Lëvizja Vetëvendosje ka marrë numrin më të madh të votave, duke kryesuar bindshëm me 87.15 për qind të votave të numëruara deri më tani.

Në vendin e dytë renditet Partia Demokratike e Kosovës (PDK) me 5.50 për qind të votave, e ndjekur nga Lidhja Demokratike e Kosovës (LDK) me 4.87 për qind.

Ndërkohë, Aleanca për Ardhmërinë e Kosovës (AAK) ka siguruar 1.59 për qind të votave, Kosova Demokratik Turk Partisi (KDTP) 0.27 për qind, ndërsa Nisma Socialdemokrate 0.26 për qind.

Procesi i numërimit të votave nga përfaqësitë diplomatike pritet të vazhdojë edhe në orët dhe ditët në vijim, derisa të publikohen rezultatet e plota për votën e diasporës./Albinfo.ch 

---