KQZ-ja i kërkon diasporës t’i dërgojnë fletëvotimet para se t’i pranojnë ato

Më shumë se 6 mijë votues jashtë Kosovës kanë të drejtë për të votuar në balotazh në 19 komunat në vend.

Por, votuesit që jetojnë jashtë Kosovës, KQZ-ja u kishte kërkuar që t’i dërgojnë fletëvotimet, para se t’i pranojnë ato me postë.

Mesazhe të tilla konfuze janë përcjellë në KTV nga bashkatdhetarët. Në një mesazh shkruhej: “Duke qenë se koha është e shkurtër në pranimin e materialeve për votim që dërgohet nga ana e KQZ-së dhe dërgimin e materialeve nga ana juaj për në adresën e KQZ-së, ju lusim që pakon me fletëvotime ta dërgoni para se t’ju vjen pakoja e KQZ-së përmes dërgesës postare në adresën tuaj ku banoni”, përcjell albinfo.ch.

Valmir Elezi, zëdhënës i KQZ-së, thotë se nga certifikimi i rezultateve, në uebfaqen e KQZ-së janë vendosur fletëvotimet për komunat ku ata votojnë, transmeton KTV.

Bashkatdhetarët për të mos pritur mbërritjen e pakos me fletëvotimin në shtëpi, mund të shkarkojnë ato nga uebfaqja e KQZ-së dhe t’i dërgojnë.  Kjo, sipas Elezit është bërë për të mos humbur kohë, marrë parasysh se afati i fundit që fletëvotimi i plotësuar të mbërrijë është 17 nëntori, dy ditë para afatit të rregullt.