KQZ hap 914 kuti votimi: Rinumërimi mund të zgjasë deri në 14 ditë

Ka nisur procesi i rinumërimit të 914 vendvotimeve nga zgjedhjet e parakohshme parlamentare të mbajtura më 28 dhjetor 2025. Ky proces po zhvillohet në Qendrën e Numërimit dhe Rezultateve dhe, sipas Komisionit Qendror të Zgjedhjeve (KQZ), pritet të zgjasë rreth dy javë, konkretisht nga 12 deri në 14 ditë.

Zëdhënësi i KQZ-së, Valmir Elezi, bëri të ditur se rinumërimi do të realizohet në 20 tavolina numërimi, ndërsa çdo ditë planifikohet të rihapen mesatarisht rreth 80 kuti votimi. Vendimi përfshin 914 vendvotime nga gjithsej 2,557, që përbëjnë rreth 36% të totalit.

Sipas vendimit të KQZ-së, në 10 komuna do të rinumërohen të gjitha vendvotimet, ndërsa në 28 komuna të tjera rinumërimi do të përfshijë vetëm 10% të tyre. Elezi sqaroi se kjo qasje e diferencuar është vendosur në bazë të specifikave dhe gjetjeve për secilën komunë.

Vendimi për rinumërim është marrë pas identifikimit të mospërputhjeve gjatë procesit të verifikimit të votave për kandidatë për deputetë. Gjatë shqyrtimit të videoincizimeve nga Qendrat Komunale të Numërimit dhe verifikimit të brendshëm të fletëvotimeve në disa vendvotime, është konstatuar se numri i votave të evidentuara në fletëvotime nuk përputhej me ato të numëruara fillimisht.

Elezi theksoi se qëllimi i këtij procesi është garantimi i saktësisë së rezultateve dhe ruajtja e integritetit të zgjedhjeve, në mënyrë që rezultati përfundimtar të pasqyrojë realisht vullnetin e qytetarëve.

Rinumërimi erdhi si pasojë e raportit të Sekretariatit të KQZ-së, i cili pas verifikimit të 2% të vendvotimeve nga të gjitha komunat, ka konstatuar parregullsi në një numër prej tyre, çka ka nxitur marrjen e këtij vendimi nga KQZ.