Kosovë: Presidentja Osmani mandaton Glauk Konjufcën për formimin e Qeverisë së re

Presidentja e Republikës së Kosovës, Vjosa Osmani, ka mandatuar kryetarin e Kuvendit, Glauk Konjufcën, për formimin e Qeverisë së re të vendit. Kandidatura e tij është propozuar nga Lëvizja Vetëvendosje.

Gjatë një konference për media, Osmani theksoi se veprimi i saj është në përputhje të plotë me Kushtetutën e Kosovës dhe me vendimet e mëhershme të Gjykatës Kushtetuese.

“Kushtetuta nuk lë hapësirë për mosemërim të kandidatit të dytë kur ekziston një mandatar i propozuar. Gjuha që përdor Kushtetuta është obligative”, u shpreh Osmani, duke shtuar se ka respektuar nenin 95, pika 4 të saj.

Ajo njoftoi se më herët kishte ftuar partitë opozitare për të ofruar një kandidat tjetër, por ato kanë refuzuar të propozojnë emër për mandatar.

Sipas Presidentes, ky vendim synon të ruajë stabilitetin institucional dhe të shmangë zgjedhjet e parakohshme.

“Vet funksionalizimi i shtetit vihet në rrezik nëse mbetemi për muaj të tërë pa institucione. Me këtë mandat, unë po përmbush detyrimin kushtetues për t’i dhënë vendit mundësinë të krijojë qeveri”, shtoi ajo.

Osmani shprehu optimizëm se partitë politike mund të arrijnë marrëveshje për formimin e institucioneve, duke bërë thirrje që interesi i shtetit të vihet mbi çdo interes partiak.

 “Ka ende hapësirë për dakordim. Është më e rëndësishme të arrijmë vendime të mira për qytetarët sesa të përcaktojmë datën e zgjedhjeve,” tha ajo.

Në fund, Presidentja theksoi se nëse edhe përpjekja e dytë për formimin e Qeverisë dështon, vendi do të shkojë në zgjedhje të reja.

Ajo apeloi që në këtë periudhë të ndjeshme politike, partitë dhe deputetët të kontribuojnë për stabilitetin e vendit, sidomos përballë sfidave të jashtme dhe të brendshme.

“Është jetike që Kosova të ruajë stabilitetin e saj institucional dhe të përfitojë nga mundësitë për miratimin e planeve zhvillimore dhe buxhetit,” përfundoi Osmani.