Kosovë – Kroaci, marrëveshje kulturore

Marrëveshja u nënshkrua nga ministri i Kulturës, Rinisë dhe Sportit, Kujtim Shala dhe ministri kroat i Kulturës, Zlatko Hasanbegović

Qeveria e Kosovës dhe ajo e Kroacisë kanë nënshkruar sot në Zagreb një marrëveshje ndërshtetërore për bashkëpunim kulturor. Marrëveshja u nënshkrua nga ministri i Kulturës, Rinisë dhe Sportit, Kujtim Shala dhe ministri kroat i Kulturës, Zlatko Hasanbegović.

Shala e Hasanbegović thanë se kjo marrëveshje protokolare i rregullon raportet në fushën e kulturës dhe do të pasohet me bashkëpunim konkret ndërmjet institucioneve të kulturës së dy vendeve.

Dy ministrat në takimin e përbashkët biseduan për një varg çështjesh të interesit të përbashkët, si dhe për nevojën e rritjes të bashkëpunimit kulturor ndërmjet Kosovës dhe Kroacisë. Ata u shprehën se Kosova dhe Kroacia kanë pasur bashkëpunim të vazhdueshëm kulturor, por kjo marrëveshje e sotme e natyrës politike, këtij bashkëpunimi i jep dimension tjetër, sepse raportet ndërmjet këtyre dy shteteve rregullohen dhe marrin karakter shtetëror.

Ministri Shala dhe Hasanbegović e vlerësuan këtë marrëveshje si tejet të rëndësishme për thellimin e raporteve bilaterale mes Kosovës dhe Kroacisë, të cilët janë domethënëse dhe i kontribuojnë paqes dhe stabilitet në rajon, meqë Kosova dhe Kroacia kanë raporte historike, që domethënë raporte politike e kulturore.

“Kultura ndikon drejtpërdrejtë në afrimin e popujve, ndaj kërkohet që t’i kushtohet vëmendje e veçantë. Kjo marrëveshje është bazë e mirë për një prezencë më të madhe të Kroacisë në Kosovë dhe anasjelltas”, tha ministri Shala dhe shtoi se kjo praktikë, duhet të vazhdohet edhe në fusha tjera.

Më tej ministri Shala u shpreh se kjo marrëveshje e natyrës politike, krijon kushte të volitshme që të konkretizohet me nisma dhe aktivitete të përbashkëta në fushën e kulturës, trashëgimisë kulturore, librit, muzeut dhe sferave tjera të artit.

Sipas ministri kosovar, Kosova i është mirënjohëse shtetit kroat për mbështetjen e vazhdueshme që i ka dhënë Kosovës, e cila vazhdon me të njëjtin intensitet edhe tani.

Sipas një njoftimi për media, Marrëveshja e Bashkëpunimit Kulturor synon të zgjerojë bashkëpunimin ndërmjet institucioneve nacionale në fushën e kulturës, përmes aktiviteteve që kontribuojnë në njohjen më të mirë të dy vendeve, përmes respektimit të të drejtave dhe detyrimeve të përfshira në traktatet ndërkombëtare.

“Kjo marrëveshje bashkëpunimi, po ashtu specifikon temat dhe fushat e interesit të përbashkët, në ngjarje kulturore, në fushën e arteve pamore, në muze e galeri, pastaj në thellimin e bashkëpunimit ndërmjet institucioneve përgjegjëse për arkivat kombëtare, bibliotekat, si dhe thellimin e formave të bashkëpunimit në fushën e letërsisë, muzikës, arteve skenike, shtëpive botuese, filmit, etj”, thuhet në njoftim.

Marrëveshja përfshinë edhe bashkëpunimin në fushën e pakicave kombëtare dhe pronësisë intelektuale.