Kosovë, këtë javë pritet vendimi për heqjen e vizave

Madje president i Kosovës, Hashim Thaçi ka deklaruar se procesi i heqjes së vizave nuk po numërohet me muaj apo me javë, por me orë

Procesi i liberalizimit të vizave për kosovarët pritet të ndodhe brenda kësaj jave, madje mediet në Prishtinë besojnë se të mërkurën do të merret vendimi përfundimtar. President i Kosovës, Hashim Thaçi ka deklaruar se procesi i heqjes së vizave nuk po numërohet me muaj apo me javë, por me orë.

Procesi për liberalizimin e vizave “nuk është duke i numëruar ditët dhe javët, por mund të them se është duke i numëruar orët”, ka deklaruar sot presidenti i Republikës së Kosovës, Hashim Thaçi.

“Mund të them se Kosova ka zbatuar të gjitha kriteret e nevojshme për rekomandimin e vizave nga Brukseli, prandaj dua të potencoj se procesi për liberalizmin e vizave për Kosovën tashmë nuk është duke i numëruar ditët dhe javët, por mund të themi se është duke i numëruar orët dhe ky është një lajm i mirë dhe histori e re për Kosovën”, është shprehur Thaçi.

Siç raporton e përditshmja “Zëri” Komisioni Evropian përveç rekomandimit pozitiv rreth vizave për Kosovën, pritet që këtë të mërkurë të marrë vendim për futjen e saj në një bllok me Ukrainën, Gjeorgjinë dhe Turqinë. Ndërsa, fundi i qershorit pritet të jetë fundi i izolimit për kosovarët

Megjithatë, sipas të përditshmes britanike “DailyMail”, lëvizja e lirë për qytetarët e Kosovës nuk do të vonohet gjashtë muaj. Sipas kësaj të përditshmeje, në rast të aprovimit të vendimit për heqjen e vizave për Kosovën dhe Turqinë nga liderët evropianë, atëherë marrëveshja do të dërgohet për ratifikim në Parlamentin Evropian në fund të muajit qershor, kur edhe pritet që të hyjë në fuqi menjëherë…

Kosova është vendi i fundit në Ballkan që nuk është përfshirë në procesin e liberalizimit të vizave me Bashkimin Evropian. BE në dhjetor të vitit të kaluar kërkoi nga Prishtina zyrtare që t’i përmbushë edhe 8 kritere të veçanta, të cilat sipas Qeverisë së Kosovës,  janë përmbushur në muajin mars. Tani, siç ka deklaruar kryeministri Isa Mustafa, vendimi është politik jo teknik.