Kosovë, 130 persona po hetohen për terrorizëm

Krimi i organizuar dhe terrorizmi në Kosovë është duke shënuar rritje deri në atë masë, sa është duke ndikuar edhe në jetën dhe mirëqenien e njerëzve, thonë prokurorët vendorë

Prokuroria Speciale e Kosovës është duke zhvilluar hetime kundër 130 personave të dyshuar për terrorizëm. Kështu deklaroi ushtruesi i detyrës së Kryeprokurorit të Shtetit, Sylë Hoxha, në konferencën rajonale me temë: “Sfidat në luftimin e krimit të organizuar, terrorizmit dhe bashkëpunimi me Evropën jug-lindore”.

Hoxha tha se grupet e organizuara kriminale dhe kryesit e veprave penale terroriste, janë duke i demonstruar, “aftësi të jashtëzakonshme në realizimin e qëllimeve të tyre”. Po ashtu Hoxha tha se krimi i organizuar dhe terrorizmi në Kosovë është duke shënuar rritje deri në atë masë, sa është duke ndikuar edhe në jetën dhe mirëqenien e njerëzve.

“Në vitin 2013, janë shkatërruar gjithsej 61 grupe kriminale. Ndërsa në vitin 2014 deri ne muajin nëntor janë shkatërruar 45 grupe kriminale që kanë vepruar jo vetëm në Kosovë, por edhe me gjerë. Si rezultat i këtyre operacioneve një numër i madh i personave janë arrestuar dhe janë vënë para organeve të drejtësisë”, deklaroi Hoxha.

Mbi bazën e bashkëpunimit dhe koordinimit të veprimeve ne mes të prokurorit të shtetit dhe policisë, sipas tij prokuroria është duke hetuar këto 130 raste të dyshuara.

Ndërsa presidentja e Kosovës, Atifete Jahjahga tha se asnjë vend nuk është i paprekshëm dhe i pacenueshëm nga trendët e fundit të radikalizmit dhe ekstremizmit, prandaj lufta kundër këtyre të këqijave, sipas saj, duhet të jetë luftë e përbashkët.

“Krimi nuk njeh kufij e as madhësi shtetesh. Secili vend i rajonit sot ballafaqohet me probleme serioze të trashëguara qoftë nga tranzicioni, qoftë nga mangësitë profesionale e ligjore, të cilat po e bëjnë të domosdoshëm bashkëpunimin tonë për ta parandaluar dhe luftuar krimin e organizuar, korrupsionin, dhe tash së fundi edhe kërcënimin terrorist që po e rrezikon sigurinë kombëtare të vendeve tona”, deklaroi Jahjaga.

Presidentja kosovare theksoi se gatishmëria e vendeve të rajonit për të bashkëpunuar, do të përcaktojë shpejtësinë me të cilën rajoni do të ecë drejt integrimeve evropiane.

“Ne kemi përqafuar vlerat progresive që përkojnë me aspiratat tona euroatlantike dhe çdo dështim në këtë luftë do të jetë kthim prapa për popujt tanë”, ka deklaruar ajo, citon REL.

Ajo tha se përtej vullnetit politik, sot nevojitet një bashkëpunim konkret ndërmjet strukturave të sigurisë, me qëllim që përgjigja të jetë e plotë dhe efektive.

Ndërsa ambasadorja amerikane në Kosovë, Tracey Ann Jacobson, ka thënë se terrorizmi nuk është problem vetëm i Kosovës, por është problem ndërkombëtar.

“Bashkëpunimi rajonal është çelësi i suksesit kundër luftimit ndaj krimit të organizuar. Viteve të fundit kemi një përparim në luftën kundër krimit të organizuar, por ende mbetet punë. Krimi i organizuar nuk njeh kufij, në fakt dua të them se kriminelet i përdorin kufijtë për te mirën e tyre”m deklaroi ajo.

Është e rëndësishme, sipas saj, që të gjithë të punojnë për luftën kundër krimit të organizuar dhe terrorizimit.

“Adresimi i këtyre kërcënimeve kërkon përkushtim, dhe bashkëpunim dhe dëshiroj që të theksoj se Shtetet e Bashkuara i marrin këto kërcënime ndaj Ballkanit si shumë serioze, dhe jemi të përkushtuar për të ndihmuar”, deklaroi Jacobson.

Përfaqësuesi i Bashkimit Evropian në Kosovë, Thomas Gnocchi, tha se BE-ja ne vazhdimësi e mbështet Ballkanin perëndimor ne përpjekjet që ky rajon të ndaloj që të ketë rolin e transitit ose të jetë qendër logjistike për grupet te tilla.

“Edhe pse kërcënimi nga terrorizimi në Evropën Jug-lindore është i njohur, ngjarjet e fundit lidhur me radikalizmin dhe grupet ekstreme, janë shqetësuese. Për kapacitetet për pengimin e radikalizmit, përfshirë edhe masat adekuate për pjesëmarrje në konflikte”, deklaroi Gnochi.

Në këtë konferencë që u organizua nga Kryeprokuroria e Shtetit të Kosovës, po marrin pjesë përfaqësuesit e institucioneve të Kosovës, ata të Shqipërisë, Maqedonisë, Kroacisë, Sllovenisë dhe Malit të Zi. Konferenca po mbahet në Prishtinë. 

---