Kosova të shkruajë historinë në hendboll

Me fitore hendbolli kosovar do të shkruajë histori të re për sportin kosovar, si shumë herë deri më tani

Nga ora 18:00 në Prishtinë, sot zhvillohet finalja e “IHF Trophy Interctontinental” në grupmoshën e juniorëve (U21).

Takohen Kosova me Taipein Kinez. Te ekipi i Kosovës janë optimistë për fitore, por po ashtu premtojnë të jenë të përkushtuar maksimalisht, serioz dhe shpresojnë të kenë përkrahjen e duhur nga tribunat, përcjell albinfo.ch.

Dhe me fitore hendbolli kosovar do të shkruajë histori të re për sportin kosovar, si shumë herë deri më tani. Asnjë ekip kombëtar i Kosovës deri më tani nuk është paraqitur në Kampionat Botëror dhe këtë e siguron Kosova U21 me fitore ndaj Taipeit Kinez.

Rëndësia e ndeshjes është shumë e madhe dhe e madhe shpresohet të jetë edhe përkrahja e tifozëve.

Kosova U21 ka qenë superiore deri më tani në “IHF Trophy Intercontinental”. Ka fituar ndaj Taipeit Kinez  (31:23), ndaj Nigerisë (34:21) dhe në gjysmëfinale ndaj Paraguait (36:27). Taipei Kinez kishte fituar me shumë vështirësi ndaj Nigerisë (30:29) dhe në gjysmëfinale befasoi SHBA-në (41:36).

Krahas garës ndërkombëtare që po zhvillohet në Prishtinë, ndeshje me shumë rëndësi për hendbollin kosovar zhvillohet nga ora 19:00 në Tel Aviv të Izraelit.

Në kuadër të grupit 1 të fazës së dytë kualifikuese për Euro 2020, Kombëtarja e Kosovës takohet me Izraelin.

Të mërkurën Kosova impresionoi në Prishtinë dhe fitoi ndaj Izraelit me rezultat 27:24.

Kosova i ka dy pikë, sa edhe Polonia e Izraeli dhe me fitore në Tel Aviv do të dal në vend të dytë dhe do të bëjë hap gjigand drejt kualifikimit në Evropian.

---