Kosova të hënën fillon me fazën e dytë të lehtësimit të masave

“Hapja e fazës së dytë mund të vazhdojë më 18 maj, ashtu siç është planifikuar. Tashmë kur do të marrim vendim nga faza e parë në të dytën, duhet të punojmë që së bashku të ulim infektimet”, tha Kurti

Kryeministri Kurti në konferencën e sotme për media ka bërë të ditur se nga e hëna do të vazhdohet me fazën e dytë të lehtësimit të masave kundër COVID-19.

Ashtu siç është planifikuar, më 18 maj do të hapen disa biznese.

“Hapja e fazës së dytë mund të vazhdojë më 18 maj, ashtu siç është planifikuar. Tashmë kur do të marrim vendim nga faza e parë në të dytën, duhet të punojmë që së bashku të ulim infektimet”, tha Kurti në konferencën për medie.

“Faza e dytë nënkupton hapjen e ekonomisë e numër të shtuar të qytetarëve. Nga e hëna hapen këto biznese: floktarët e sallonet e ondulimit, stomatologët, tregtarët me pakicë e tregu i gjelbër, gastronomia (take-away), transporti urban e ndërurban me leje, si dhe hapja e galerive dhe muzeve. Por, meqenëse rreziku s’ka kaluar, edhe në fazën e dytë do të ketë kufizim të lëvizjeve, por do të shtohet një orë. 2 herë në ditë nga 2 orë, sipas shifrës së fundit të kartës së identitetit”, ka shtuar ai, përcjell albinfo.ch.

 

---