Kosova, pjesëmarrëse në Kongresin më të madh europian të blerësve

Në kuadër të bashkëpunimit strategjik të Odës Ekonomike Gjermano-Kosovare (OEGJK) me Asociacionin për Menaxhim të Zinxhirit të Furnizimit, Prokurimit dhe Logjistikës (BME) në Gjermani – Kosovës i mundësohet pjesëmarrja në Simpoziumin e 54-t të BME në Berlin më 13-15.11.2019 në Berlin.

Organizuar nga Oda Ekonomike Gjermano-Kosovare sivjet për herë të dytë Kosova prezantohet me stendat e saj në këtë event të madh ekonomik.

Delegacioni kosovar përbëhet nga firma anëtare të OEGJK-së: M-Technologie, IMK, Auromatics, Natural Arts – Software Artisan, Devolli Corporation, University for Business and Technology, Iron Consulting dhe KosBit, dhe kryesohet nga drejtoresha menaxhuese e OEGJK-së, Nora Hasani, përcjell albinfo.ch.

Ambasadori Beqë Cufaj sot ka vizituar përfaqësuesit nga Kosova dhe ka takuar edhe udhëheqësin kryesor të kësaj ngjarjeje ekonomike, Dr. Silvius Grabosch, si dhe ka bashkëbiseduar me bizneset nga Kosova. I pranishëm në këtë bashkëbisedim ishte edhe z. Helge Tolksdorf, Drejtor për Zgjerimin e BE-së në Ministrinë e Ekonomisë dhe Energjetikës të Gjermanisë.